Ang beteranong forward nga si Carmelo Anthony posible nga mabalik sa lugar diin siya nakahimo og maayong marka sa iyang basketball career.

Hungihong karon sa National Basketball Association (NBA) ang posibilidad nga pagduwa ni Anthony sa New York Knicks o sa New Jersey Nets kon di kini mobalik sa Lakers karon nga offseason.

Matod sa balita sa fadeawayworld, usa ka basketball website, nga pwedeng mo-link si Anthony sa Nets ug Knicks.

Wa makasulod ang Lakers sa NBA playoffs sa 2022 season, bisan pa anaa ang mga superstars nga si Lebron James, Anthony Davis, Russell Westbrook, Anthony ug uban pa.

Nakaduwa si Anthony sa New York niadtong 2011 ngadto sa 2017, diin iyang gibituonan ang maong team.

Ang Brooklyn-native nga si Anthony mahimong free agent sa pagsugod sa offseason.

Hinuon, sa edad nga 38 anyos, milapas na sa iyang physical peak si Anthony, apan ang iyang kasinatian dako og matabang sa team nga iyang sudlan.

Lakip sa basketball resume ni Anthony mao ang 10-time All Star selection ug 1-time scoring champion.

Nasulod si Anthony sa NBA sa tuig 2003 isip third overall pick sa Denver Nuggets. Si Lebron James ang nahimong first overall pick sa Cleveland Cavaliers.

Ang kadungan nila ni Anthony ug James sa draft class mao sila Dwyane Wade, Chris Bosh, Chris Kaman, David West, Leandro Barbosa, Kendrick Perkins, Mo Williams ug Kyle Korver.