Nikabat og 3,714 ka nursing graduates gikan sa Pilipinas ang buot motrabaho sa United States human nikuha og licensure examination sa unang higayon gikan sa Enero ngadto sa Marso ning tuiga.
Ang gidaghanon sa first quarter sa National Council Licensure Examination (NCLEX) nga nikuha sa pasulit nisaka og 147 percent gikan sa 1,501 ka Filipino nursing graduates nga ningkuha sa samang pasulit sa parehong panahon sa 2021, sumala ni Cebu First District Rep. Eduardo Gullas, miyembro sa House committee on higher and technical education.
Matod ni Gullas sa press statement kagahapon Hunyo 19, 2022, ang pagpasar sa NCLEX sagad maoy pinal nga hugna sa pagproseso nga makatrabaho sa Amerika, ang gidaghanon sa mga graduwado gikan sa Pilipinas nga nikuha sa pasulit sa unang higayon maoy maayong sukdanan kon unsa ang gidaghanon ang buot mopuno sa US labor market.
Ang US National Council of State Boards of Nursing Inc. (USNCSBN) maoy nagdumala sa NCLEX.
“Our universities should invest more aggressively in training entry-level nurses if we want to supply the global demand for new practitioners while also fulfilling the local requirement,” matod ni Gullas, kinsa gikatakda nga pulihan sa First District Representative-elect Rhea Gullas, asawa sa iyang apo nga si Talisay City Mayor Gerald Anthony “Samsam” Gullas Jr.
Base sa USNCSBN statistics, dunay 225,551 nursing graduates gikan sa Pilipinas ang ningkuha sa NCLEX sa unang higayon sukad sa 1994.
“Our single biggest advantage in foreign labor markets is that we are teaching our Bachelor of Science in Nursing program in English, the world’s bridging language,” matod ni Gullas.
Ang World Health Organization (WHO), sa iyang State of the World’s Nursing report, nibanabana nga kon walay aksiyon nga buhaton, “there will be a shortfall of 4.6 million nurses worldwide by 2030.”
Sa Pilipinas, ang WHO nagkanayon nga ang kakuwang sa nurses moabot og 249,843 sa tuig 2030, kon dili hatagan og aksiyon sa local health sector.
Apan ang Pilipinas nag-produce og 307,237 registered nurses sukad sa 2010, sumala sa Professional Regulation Commission.