Nagtrukis si Gov. Gwen Garcia ug si Kalihim Eduardo Año sa Department of the Interior and Local Government (DILG) bahin sa orden ehekutibo sa gobernador nga nagmando sa optional face mask policy. Ubos niini, ang tawo mismo ang magbuot kon magsul-ob ba siya o dili sa face mask sa gawas nga way daghang mga tawo.

Si Año niingon nga ang DILG di moila sa executive order ni Garcia kay dunay lagda ang Inter-Agency Task Force (IATF) for the Management of Emerging Infectious Diseases nga nag-ingon nga mahimo lang tangtangon ang face mask kon magkaon, mag-inom ug kon anaa sa usa ka “well-ventilated sports activities.”

Sa akong tan-aw, wa kaayo maaninaw ni Año ang pulong nga optional. Wa makalapas ang gobernador sa lagda sa IATF. Iya lang nga gi-modify. Sa pag-ingon niya nga optional, wa siya magmando nga tangtangon na ang face mask sa tanang higayon.

* * *

Ginuntan dayon ni Año og mga hulga ang gobernador. Lakip niini mao ang hulga sa pagsikop niadtong di magsul-ob og face mask. Apan ang Cebu Provincial Board nipasar og ordinansa nga nagsagop sa iyang executive order. Abi ninyo kon modugo ug magpaawot ang gobernador. Wa ug dili.

Matod pa sa gobernador, magpabilin ang iyang orden ehekutibo, ilabi na nga gipaluyohan na kini karon sa usa ka ordinansa. Matod niya, illegal ang pagsikop sa di magsul-ob og face mask sa lalawigan sa Sugbo kay way ordinansa nga nagsilot niini.

Nahibung ko nganong karon lang ni mitumaw, ang hulga sa pagsikop sa di magsul-ob sa face mask. Sa panahon sa kampanya, matod pa ni Gov. Gwen, way aksyon si Año batok sa nanambong sa mga rally nga wa magsul-ob og face mask.

* * *

Usa sa nagsunod niining atong lindog nag-ingon nga nakalimot tingali si Año nga apil siya sa mga “Tom Jones,” ang binuang bahin sa mga kawani ug opisyal sa gobyerno nga kutob ras sa Hunyo kay matapos na ang ilang termino. Si Gov. Gwen reelected sa kapin sa 1.4 ka milyon ka botos ug duna pay laing tulo ka tuig sa puwesto.

Ang optional face mask order pa gyud ni Gov. Gwen ang iyang giinitan. Atong klaruhon nga wa man magmando ang gobernador nga tangtangon na sa tanang higayon ang face mask. Kinahanglan man gihapon kini sa indoors o sa mga lugar nga nagtampunsisok ang daghang mga tawo.