TIGBAK ang duha ka mga pinangita sa balaod human misukol sa mga awtoridad alas 2:40 sa hapon sa Matanog, Maguindanao Province niadtong Hulyo 18, 2022.
Giila ang mga napatay nga sila Norodin Guimad, lider sa Armed Lawless Group (ALG) ug kauban nga si Puti Sumanday.
Matud ni Matanog Chief of Police Lieutenant Junior Abas nga gironda nila ang gitagoan sa mga suspek sa Barangay Bugasan Sur, Matanog, Maguindanao Province, uban ang puwersa sa Marine Battalion Landing Team (MBLT-5).
Apan pasulod pa lang ang raiding team sa target, gipabuthan na sila sa mga suspek. Napugos sa pagbawos ang mga awtoridad hinungdan sa pagka-impas ni Guimad ug Sumanday.
Narekober gikan sa posisyon sa mga suspek ang usa ka ka M16 Armalite rifle, usa ka kalibre .45 nga pistola, mga bala, bandolier ug mga magazines.
Nasayran nga mga suspek dunay nakaung-ong nga warrant of arrest gumikan sa kaso nga murder ug frustrated murder.