Gilaraw ni 5th district Representative Vincent Franco “Duke” Frasco nga moduso sa Kongreso og resolusyon alang sa pagsuporta sa optional nga paggamit og face mask sa mga hawan ug well ventilated areas sa Probinsya sa Sugbo.
Kini maoy gipahibawo ni Frasco nga iyang pagahimuong lakang sa hingpit nga pagbukas sa 19th Congress sa Hulyo.
Matod ni Frasco nga haom ang maong lagda ilabi na sa padayong pagkunhod sa mga kaso sa probinsya ug ang taas nga vaccination rate sa nasud nga makatabang sa pagbanhaw sa ekonomiya.
“Easing up on the mask mandate corresponds to the call of times, with our general population being vaccinated, hospitalization due to Covid-19 at very low levels, and our economy being in dire need of resuscitation,” matod ni Frasco sa iyang press statement sa Hunyo 20, 2022.
“This can only happen if we rationalize the mandates that convey our openness to move forward like other recovering economies have done post-pandemic such as the United States, the United Kingdom, Singapore, and Thailand,” dugang niya.
Sa Hunyo 8, 2022, niluwat og Executive Order No. 16 si Cebu Governor Gwendolyn Garcia sa optional nga pagsul-ob sa face mask basta anaa lang sa hawan ug well-ventilated areas sa Probinsya.
Ubos sa maong lagda, gikinahanglan gihapon magsul-ob og face mask kon anaa sa air-conditioned, sirado nga dapit sama sa mga offices, malls ug ilabi na kon anaa sa crowded outdoor areas.
Ang mga Sugboanon nga dunay sakit o nakasinati og simtomas sa Covid-19 gimandoan usab sa pagsul-ob og face mask aron dili kini makatakod sa uban.
Subay sa maong lagda, nahimo kining balaod human gipasar ang Provincial Ordinance 2022-03 “Rationalizing the use of facemask in the Province of Cebu” atol sa special session sa Hunta Probinsyal sa Hunyo 14.
Una na nga gipadayag sa Kapitolyo nga dunay legal nga basehan ang lagda niini kalabot sa optional nga pagsul-ob og facemask. Gitumbok sa kagamhanan ang gahum sa pagpatuman sa ordinansa pinaagi sa Local Government Code.
Apan supak si Dept. of the Interior and Local Government (DILG) Secretary Eduardo Año kay ang nasod gihulga pa sa Covid-19.
Sa miaging semana, mihatag og tagal si Año hangtod sa hinapos sa semana kang Garcia ug Provincial Board sa pag-amendar sa ordinansa ug EO sa gobernador.