Ang Cebu City Police Office CCPO makig-alayon sa City Social Welfare and Services (DSWS) sa Kagamhanan sa dakbayan sa Sugbo human nabantayan nga nibalik na usab ang mga batang libud suroy sa kadalanan nga magpakilimos sa mga motorista nga naghatag og peligro sa ilang kaugalingon.
Gawas sa mga bata, nabantayan usab ang pagbalik sa mga hamtong nga namuyo usab sa mga aseras sa dakbayan.
Nawagtang ni sila atol sa pagsaka sa coronavirus disease 2019 (Covid-10) sulod sa duha ka tuig apan sa dihang giluagan na ang restrictions sa tibuok isla sa Sugbo, namalik na usab kini.
Tungod niini, matod ni Police Lieutenant Colonel Wilbert Parilla, deputy director for administration sa CCPO, ilang hatagan og pagtagad uban sa CSWS ug Department of Social Welfare and Development (DSWD) 7 kining butanga.
“Like before rescue operations nga gibuhat ani, so with this, we will also give directives sa atong operations to coordinate with CSWS for another rescue operations sa mga street dwellers and to include kining mga minors nga mangayo diha sa mga sakyanan,” matod ni Parilla.
Dugang ni Parilla nga ila kining hatagan og pagtagad sa labing dali nga panahon uban sa Kagamhanan sa Dakbayan sa Sugbo.
Giangkon niya nga walay pasilidad ang CCPO alang sa ma rescue nga mga menor.
Ang ilang gibuhat mao ang pag turnover niini sa CSWS o sa DSWD 7.
Una nang nihimog rescue operation ang kapulisan sa siyudad uban sa Kagamhanan sa Dakbayan sa Sugbo sa mga bata nga naa lang nagpuyo kilid sa karsada ug ilawom sa mga taytayan aron papaulion sa ilang panimalay.
Kasagaran kanila naa nagpuyo sa asiras mao kadtong taga probinsya sa Sugbo nga mianhi sa siyudad tungod kay naa dinhi ang ilang panginabuhian.
Si Konsehal Philip Zafra sa dakbayan sa Sugbo nagkanayon nga daghang mga rason nganong naabot ang maong mga street dwellers dinhi uban sa mga batang libud suroy nga angay sulosyonan sa gobyerno.
“Daghang kaayong approach ani. Una, nganong naa sila diha? Maybe napasagdan sa ginikanan. Ikaduha livelihood siguro nga problema. So, daghan ni nga concern. So, first we have to ask the CSWS for a report on this para ma guide-an ta kon unsay angay nga buhaton para ato ning maatiman,” pasabot ni Zafra.