MIUBOS ang ihap sa mga aktibo nga mga kaso sa coronavirus disease (Covid-19) sa Dakbayan sa Cagayan de Oro.

Anaa na sa 11 ang aktibo nga mga kaso sa dakbayan ug nakatala usab ang syudad og usa ra ang bag-ong kaso.

Ang usa ka bag-ong kaso usa ka lokal index nga kaso nga gilangkuban sa usa ka nabakunahan nga 46-anyos nga babae residente sa Barangay Gusa ug samtang naka-admit karon sa Northern Mindanao Medical Center.

Miabot sa 25,888 ang kinatibuk-ang ihap sa mga kaso sa Covid-19 sa dakbayan.

Ang Cagayan de Oro adunay 11 ka mga aktibo nga mga kaso, duha niini na-admit sa Northern Mindanao Medical Center ug siyam ang mga outpatient.

Nakatala usab og duha ka mga coronavirus-positive nga mga kaso nga karon naka-recover human nagnegatibo ang resulta sa ilang repeat swab test.

Anaa na karon sa 24,936 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 941.