"GITAWAG ni Dar ang desisyon ni Marcos nga usa ka kadaugan sa sektor sa agrikultura tungod kay nakaseguro siya nga daghan ang mahatag nga kaayohan sa mga mag-uuma."

***

DAGHAN sa akong mga nahinabi kagahapon ang nagsulti nga usa ka nindot nga desisyon ang giluwatan ni President-elect Ferdinand R. Marcos Jr. nga pangulohan ang Department of Agriculture (DA) tungod kay nagpakita kini sa iyang "political will" nga mapanindot ang agrikultura sa nasud.

Unang mihangop sa maong desisyon mao si Agriculture Sec. William Dar, kinsa mobiya na sa iyang opisina dungan ni Pangulong Rodrigo R. Duterte karong Hunyo 30, 2022.

"We welcome the decision of President-elect Ferdinand R. Marcos, Jr. to personally oversee and be at the helm of the Department of Agriculture. This is the brand of 'political will' that we have been advocating since we assumed office in August 2019," sulti pa ni Dar.

Gitawag ni Dar ang desisyon ni Marcos nga usa ka kadaugan sa sektor sa agrikultura tungod kay nakaseguro siya nga daghan ang mahatag nga kaayohan sa mga mag-uuma.

Si Marcos mianunsyo niini niadtong miaging adlaw nga kuhaon ang portfolio sa Agriculture Secretary tungod kay iyang nakita nga daghan kaayo ang problema nga nasinati nato karong panahona.

Ang pagpakusog sa programang agrikultura maoy nahisgutan sa among collaborative meeting uban sa mga opisyales sa University of Mindanao Professional Schools, Davao Light and Power Company, ug City Agriculturist Office kagahapon sa buntag.

Nakasentro ang among panaghisgut sa paghatag og panginabuhian sa mga drug reformists sa Barangay Biao Guianga, Biao Escuela, Los Amigos, Ma-a, ug Magtuod.

Kining paghatag og livelihood project kanila base sa resulta sa among research nga gititulohan "The Impact Evaluation of Community-Based Rehabilitation and Aftercare Program (CBRAP) for Drug Reformists," usa ka collaborative research uban sa City Anti-Drug Abuse Council (CADAC) aron masayran ang impak sa aftercare program nga gihimo sa lokal nga kagamhanan sa Davao.

Nasuta sa maong research nga samtang dunay taas nga satisfaction level sa CBRAP, girekomenda ang pagpalambo sa kahibalo sa kaayohan labot sa programa, skills training alang sa mga drug reformists, oportunidad sa pagpatungha sa ilang mga anak, ug uban pa.

Tungod niini, nahukman sa unibersidad nga makigbuligay sa gobyerno ug pribado nga kompaniya.

Mipadayag sa ilang suporta alang sa programa sila Fermin Edillon sa Davao Light and Power Company, Pablita "Bheng" Almador sa City Agriculturist Office, ug mga opisyales sa UM Professional Schools kinsa naglaum nga mapalambo ang kalidad sa kinabuhi sa mga drug reformists.