GIPAHIBAWO sa Davao City Water District (DCWD) ang 30 ka oras nga water interruption sa pipila ka bahin sa Davao City sa Hunyo 24-25, 2022.
Sumala kang Jovana Cresta Duhaylungsod, DCWD deputy spokesperson, atol sa paghinabi kaniya sa SunStar Davao kagahapon, Martes, Hunyo 21, 2022, ang hinungdan nga way agas ang tubig mao ang "repiping" project.
Sayo niini, giplanong ayuhon sa DCWD ang line 2 sa Dumoy system tungod sa liki nga nadeparahan niadtong 2021 apan tungod kay ang liki, di maayo tungod sa nahimutangan sa tubo o pipeline nga gibanabana nga mga 12 metros ang gilawmon ug ang matang sa yuta sa lugar dali rang mahugno ug risgo sa kinabuhi ug propedad, nakahukom sila nga usbon ang pagbutang sa tubo.
"A portion of the transmission line, aduna ta’y na-detect nga leak, I think around October last year, despite our best effort nga testingan sa og repair didto sa nakita nga 12 meter deep apan wala pa nakita ang iyahang full extent sa kaning leaking portion, dako kaayo siya og risk sa katong motrabaho nga mga personahe at the same time sa katong mga surrounding nga property kay aside sa lalom na kaayo nga excavation work huyang pud ang yuta sige s’yag ka bardown," tug-an ni Duhaylungsod.
Ang liki miresulta sa pagkubos sa suplay sa tubig nga miabot na sa Panorama reservoirs nga nakatampo sa tubig sa Buhangin, Poblacion, Bajada, Tigatto, Mandug, Cabantian, Cabaguio, Mamay Road, Lanang, Pampanga, Sasa, ug Panacan.
Gikanayon ni Duhaylungsod nga tungod kay ang bag-ong tubo idugtong sa sa transmission line, wala silay opsiyon apan temporaryong putlon una ang serbisyo sa tubig.
"We have temporarily shut off gyud ang water service sa katibuk-an sa line 2 sa atoang Dumoy system aron makapahigayon sa tapping works," pagklaro ni Duhaylungsod.
Ang 30 oras nga way agas ang tubig naglakip sa pagpahubas sa transmission line, ug uban pang aktibidad nga gikinahanglan alang sa aktuwal nga pagdugtong.
Apan matud niya nga dunay water delivery alang sa mga lugar nga giingong mga "critical" nga kaso.
"Naa na tay areas nga identified daan based sa atoang pressure monitoring stations, kini gyud to silang posible nga maglisod og pundo og tubig prior the interruption kung once mahuman na ang interruption mao pud ni ang pinakadugay nga makarecover, diri naka-concentrate ang atoang delivery effort," esplikar ni Duhaylungsod.
Gitumbok sa DCWD ang mga lugar nga maapektuhan sa 30-oras nga water interruption sugod alas 8 sa buntag sa Biyernes, Hunyo 24, 2022, hangtud alas 2 sa hapon sa Sabado, Hunyo 25, 2022, ang mga mosunod ang pipila ka layo ug taas nga porsiyon sa Lanang, Pampanga, Sasa, ug Panacan (Vista Verde 1 ug 2, AFP Mutual Homes, Tierra Nino Vill, Davao International Airport, Camp Catitipan, ug ICSAMA).
Apil sab ang pipila ka lugar sa poblacion sa walang porsiyon sa Quirino kung padulong sa J.P. Laurel Avenue (gikan Bankerohan Bridge hangtud sa dalang Quirino korner J.P. Laurel Avenue); Madapo Hills, Lower Madapo, Bankerohan Public Market, Malvar St., Bacaca Road, Barangays 2, 5, 7, 8, 9, 10, 11, 12 ug 13, Don Isidro Vill, Everly Hills Subdivision, Fr. Selga St., F. Torres St., ug El Rio Vista.
Pipila ka lugar sa Buhangin gilauman sab nga way tubig nga mao ang Buhangin-Tigatto-Mandug Road (gikan J.P. Laurel Avenue hangtud DDF Subd.); Buhangin Proper, Mt. Carmel, San Vicente Buhangin, DDF Subd., Dumanlas ug Portion Buhangin-Cabantian Road (gikan crossing Milan hangtud Villa Park Subd.) sa Bread Subd., Carpio Subd., Pioneer Subd. ug Sison Vill.
Sa pikas bahin, dunay daghang nga maapektuhan nga ugar sa pipila ka bahin sa Ma-a (gikan sa Emerald Vill. hangtud sa Carlos P. Garcia Highway); Davao Riverview Vill., Emeral Vill., Luzviminda Vill., Midland Subd., Trinidad Greenhills Subd., Sangilagan Vill., New Argao Vill., Spring Vill., Garzon Compound, Pantinople Vill., Anahaw Vill., Diho Vill IV., Juario Vill., Nacialla Vill., Yniguez Vill., Villa Azalea Subd., DDF Bugac, Don Julian Vill., GEM Vill., St. Michael Vill I ug II, Metroville Subd., Sto. Nino Vill., Garcia Setters, Dinaville Subd., ug Salcedo Vill.
Samtang ang mga mosunod dunay posibleng low pressure hangtud sa way agas nga tubig; Rivera Vill., Margarita Vill., Bloomfields Subd., Lulu Subd., MDRMC Hospital, Southern Philippines Medical Center, Aquino Subd., DCWD, Jereza Subd., ug Emcor Bajada.
Gipahimangnoan ni Duhaylungsod ang katawhan nga magpundo og tubig alang sa taliabot nga water interruption ug kanunay nga susihon ang ilang Facebook page alang sa katikaran tungod kay duna pay laing water service interruption sa maong adlaw nga ipahibawo sa di madugay.