Sa gihimong clean-up drive sa kagamhanan sa Mandaue City ngadto sa Butuanon River agi og pangandam sa ting-uwan, moabot ngadto sa 50 ka toniladang basura ang nakolekta.
Matod pa ni Atty. John Eddu Ibañez, executive secretary ni Mayor Jonas Cortes, nga ang maong clean-up drive gipasiugdahan sa Department of Public Works and Highways (DPWH), Department of General Services (DGS), Mandaue City Disaster Risk Reduction and Management Office (MCDRRMO), ug ang buhatan sa city engineer nga gihimo niadtong Hunyo 20.
Sigun pa ni Ibañez nga nakadawat sila og reklamo gikan sa mga residente duol sa maong sapa nga mosanap ang tubig ngadto sa ilang kabalayan resulta sa basura nga nagtipun-og nga nakabara.
Sa kabalaka nga masinati ang grabeng baha kon sagunson ang ting-uwan human mipahibawo ang Philippine Atmospheric, Geophysical and Astronomical Services Administration (PAGASA) nga masinati ang uwanon gikan niadtong Abril hangtod na sa buwan sa Agusto, nihimo sila sa kalihukan.
Sagad sa mga nakuha gikan sa maong sapa mga plastik, nangaputol nga sanga ug punoan sa kahoy, ug ubang matang sa basura human gisudlay ang 500 metros ngadto na sa usa ka kilometro nga distansiya paingon ngadto sa baba-an sa Butuanon.
Matod pa ni Ibañez nga ang mga kahoy nga nakolekta naggikan sa bukirang bahin diin konektado ang sapa nga nangaanod atol niadtong bagyong Odette niadtong Disyembre 2021.
Subling mipahinumdom si Ibañez ngadto sa publiko ilabi na niadtong nanimuyo daplin sa sapa nga dili magpatakag labay sa ilang basura.
Nasayran nga ang sapa sa Butuanon ug Mahiga Creek gihulagway sa City Planning and Chamber of Commerce and Industry Development Office niadtong 2015 nga usa sa hinungdan sa grabeng baha sa Sugbo. (Dugang taho ni FVQ)