TANGGALON na sa City Government of Davao ang mga vaccination hubs nga anaa sa mga malls ug sa mga parks sugod Hulyo 1, 2022.
Sumala ni Davao City Covid-19 Task Force Spokesperson Dr. Michelle Schlosser, alang sa mga magpabakuna batok Covid-19 didto na sa mga health centers himuon.
Apan padayon ang mobile vaccinations nga gihimo sa mga konsehal, ang school-based vaccinations ug ang sectoral vaccinations sa mga private ug public offices.
Sumala sa lungsuranon nga si Ely Mantawel, 56-anyos, taga Busna, Barangay 76-A-Bucana nga mas sayon na hinuon kini nga pamaagi aron duol na lang ngadto sa mga tawo nga wala kalakaw tungod sa ka-busy.
"Nindot na hinuon, dali lang, duol na kaayo," ingon ni Mantawel.
Ang opisyal nagbutyag nga abli ang 18 ka mga health centers sa Davao City gikan alas 8 sa buntag hangtud alas 5 sa hapon, Lunes hangtud adlaw'ng Biyernes.
Dugang ni Schlosser nga nag-request ang Davao Covid-19 Task Force's Vaccination Cluster nga mag-abli og vaccination hub bisan usa lang ka mall kada congressional district aron nga ma-cater ang mga Dabawenyo nga bakante lang matag adlaw'ng Sabado.
Dungan niini ang paghangyo sab sa Covid-19 Task Force nga ipabilin ang usa ka drive-thru vaccination.
Base sa datus, 80.67 percent sa total target population nga 1,531,004 sa Davao City anaa na sa 87.43 percent o 1,338,584 ang naturukan sa first anti-Covid-19 vaccine shots sugad Hunyo 17, 2022.
Samtang 1,320,221 o 86.23 percent ang nakakompleto na sa seconddose. Sa booster dose, 273,238 ug 27,140 sa second booster shots.
Subling nag-awhag ang Covid-19 Task Force nga magpabakuna gayod aron luwas batok Covid-19.