NAPUHAG sa awtoridad ang usa ka giingong drug den atol sa gikasa nga buy-bust operation 1:20 sa kaadlawon, Hunyo 22, 2022, sa Candelaria Street, Ecoland, Davao City.
Nasakmit sa mga sakop sa Special Enforcement Team (RSET) sa Philippine Drug Enforcement Agency (PDEA) Davao Region, National Bureau of Investigation-South Eastern Mindanao Regional Office ug Ecoland Police Station ang P230,000 nga kantidad sa gituohang shabu.
Si PDEA-Davao Regional Director Aileen Lovitos nag-ila sa target sa buy-bust nga si alyas Yoyong, 42, public utility vehicle driver ug mulopyo sa maong lugar.
Sumala ni Lovitos, napalitan ang suspek og usa ka pakite sa gituohang shabu nga nagkantidad og P6,000.
Atol sa operasyon, nasiplatan ang duha ka indibiduwal nga sila Jona, giingong kapuyo sa target, ug usa ka alyas Mario nga nag-shabu session sud sa balay.
Nakumpiska ang duha ka mga pakite sa gituohang shabu nga dunay gibug-aton nga 14 gramos nga mokantidad og P224,000 ug mga drug paraphernalia.
Sumala sa awtoridad dugay na nilang gipanid-an ang lihok sa target person hangtud nga nakig-transak kini sa posuer buyer.
Pipila ka metros lang gikan sa balay sa suspek mao ang PNP Regional Crime Laboratory Office-Davao Region.
Kasong paglapas sa Republic Act 9165 kun Comprehensive Dangerous Drugs Act of 2002 ang ipasaka nga kaso batok sa mga dinakpan.