Dili sakto ang sukod matag litro?
Tulo ka gasolinahan sa dakbayan sa Sugbo nasakpan nga wala ma-calibrate ang ilang gas pumps atol sa kinalit nga inspeksyon sa kapulisan ug sa kagamhanan sa siyudad nunot sa kamandoan ni Cebu City Mayor Michael Rama.
Human misulbong pag-ayo ang balor sa gasolina ug krudo nga halos mag-usa ka gatus na ang matag litro, ang kapulisan ug ang Prevention, Restoration, Order, Beautification and Enhancement (Probe) ug City Environmental Sanitation and Enforcement (Ceset) teams sa pagpangulo ni Raquel Arce, kalit nga gipangsusi ang mga gasolinahan sa siyudad.
Atol sa inspeksyon, adunay tulo ka gasolinahan nga wala masakto ang sukod sa ilang gas pumps nga tungod niini gipang-lock una kini ug gimandoan sa pagpa-calibrate.
“Dunay tulo ka gasoline stations sa south nasuta nga adunay depekto sa ilang calibration nga wala mainsakto sa sukod ang mogawas sa mga gas pumps,” matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO)
Dugang ni Parilla, gi-warning lang una ang maong mga gasoline station ug gimandoan nga ipatuman ang tanang rekisitos aron mapaubos sa calibration ang ilang gas pumps.
Gitinguha sa kagamhanan sa siyudad ug sa kapulisan nga walay mopahimulos sa higayon sanglit ang direktang maapektohan sa pagsaka sa presyo sa krudo mao man ang mga kabus.
Awhag nila sa mga kompanya sa gasoline station sa siyudad nga tumanon ang kamandoan aron dili kini makasugat og problema sa ilang negosyo.
Ang ngalan sa tulo ka gas stations gipugngan ning mantalaan samtang wala pa makuha ang ilang habig.
Nag-monitor usab ang CCPO sa mga namaligya og gasolina nga gipangsud sa botilya sa softdrinks nga gipang-display diha sa kilid sa karsada.