“NGANA ning Kakataskatasang panginwan: Makamal Kung kakaluguran,
masikanan-takde Ardyun, makirandam kang pasibayu king kakataskatasan kung amanu, a Kanakung idake keka para king kapakinabangnan mu a layun munye
kekang maragul a tula.
Ala karing lupung ding diwata o karing dakilang byasa ing makibalu king pigmulan Ku, uling, king sablang kagalangan, Aku ing penibatan da ring diwata at ding mangabyasa.
Yang makibalu Kanaku anting e mibait, anting alang kamumulan, anting Kakataskatasang Panginwan ding sablang labwad—ya, e melibo libutad ding tau, mikabus ya karing sablang kasalanan.
Katalinwan, belwan, katimawan king pamikakunu at kalibawan, kapatawaran,
pangamakatutwan, pamanampat king sarili at kataimikan, tula at kasakitan, beytan,
kamatayan, takut, kelangtakut, kelangkatampalasanan, katatagan, kasapatan,
pamagdimut, pamidake, pangabantug at kalausan Aku mu ing kabud linalang.
Ding pitung mangabyasa at bayu ila ding aliwang apat a mangabyasa at ding Manu
[pipimpunan ding ketawan] misapwak la king isip Ku, at ding sablang lelangan
king labwad ayti menibatan la karela.
Ninu mang makibalu king ligayang ayni at upaya Ku darapat yang alang-salat
a makatagulaling a kasuywan; kaniti alang kapikakunwan.
Aku ing pigmulan ding sablang makadiwa at makayatung labwad.
Segana-gana manibatan Kanaku. Ding byasa a makibalu kaniting kisnang kapantasan
darapat makaparikil a kasuywan kanaku layun sasamban da Ku kabilugan ding pusu ra.”
~ Dalit ning Kakataskatasang Panginwan|Dangka 10: Sunis 1-8
***
Dakal lang Banal a Kasulatan o Scriptures keti king yatu a magpatutu king pamiiral ning Kakataskatasang Ibpa, dapot e la makagyu deti bang ilarawan Ya kambe ring Kayang upaya, sikanan, kaburyan at alkwas na ing Kayang alang-panayang kapalit a lugud at pakalulu para kekatamu ngan.
Deng upaya Na mu e la abilang-bilang at alang makataruk nung makananu la karakal, karagul at nung angga la nukarin at angga la kapilan. Alang makasukad ninu man king upaya na. Alimbawa mu ing metusikluban a balu tamu ngan alus metung ya mu dapot e la pala abilang-bilang at ala lang angganan.
Ninung makasukad king metusikluban o king pekamaragul diling sikluban. Kamatutwanan, ala mang makasukad king maragul diling labwad o planeta uling mapilan la pa ring labwad a atagmwan da ring tau. E do pa man pin balu nung pilan lang tagana agyang deti mu ring makabilang king kaparalanan pang-aldo o solar system nung nu’tamu makatuknang.
Ninu mu naman mo ing makasukad king pekamalating bage keti king labwad? Ing atom atin ya pang dake. O deng dake na, makananu lang sukdan at deng dake deta makananu la namang sukdan deng dake da? Atin lang awsang electrons dapot atin pang protons at neutrons a maki-lakwas pang malating dake awsan dang quarks. Bitasang atin pang lakwas pang malating dake ning balang quark. Nung wari ala pa mung kasangkapan bang akit la reti, anti inyang ing kasangkapan pa mung pekamasikan ya pin ing microscope.
Makanyan man, deti makalabwad la mung katuwan at deti pangsamantala o pangsaguli la mu. Material elements la mu. Makananu naman nung ing pagaralan ing makadiwang katutwan o spiritual truths. Ninung makibalung ganap karing spiritual truths anti keng alang-anggang lugud at pakalulu ning Ibpang Kakataskatasan?
Deng prophets dakal la dapot metung man karela ala mu namang mekabalung ganap keng lugud at pakalulu ning Ginu agyang i Ginung YesuKristo at ya inamin na mu naman ita kapamilatan ning pamangadi na (Ibpa mi) at karing sablang pamanalimbawa na king kekaban ning makuyad a pamanuknang na keti king yatu anting metung a dalise talasuyu.
***
Dake Talabaldugan:
milayasan (pangdiwa) mitakasan, mipusitaran / mekapagpusitara, mibulusan. English – got escaped from the jail by trick or by a perfectly ingenious planning. Alimbawa king pamangamit: “Bayu ya pa ing manungkulan keng lumang sukulan dapot milayasan yang e na kabalwan.”
milele¹ (pangdiwa) nanu man o ninu man a mipunta, midane o mikabit keng lele, gilid o talindiking. English – placed on the sides, or nearby. Alimbawa king pamangamit: “Sinaguli mipate la inyang milele ya kang Kiku i Didu agyang e la pa man mibularan ditak mu man.”
milele² (panguri) misiping, miyantabe, mikanlapit, migiliran. English – beside each other; having each other close or near. Alimbawa king pamangamit: “E da tambing abalu ri Tasi at Isang a milele la palang gulut bale pilan nang banwa, nung e la mikit kabang managtal lang bungang tanaman.”
milibang (pangdiwa) midinan libang o libangan; mikalibangan. English – be diverted, amused or entertained; or got diverted, amused or entertained. Alimbawa king pamangamit: “Linibut de reng kabalen ing dalo ibat Naga ba’ya kanung milibang neng malambat neng alang paynawa kilub ning anam a banwa.”
***
MIKASING-KABALDUGANG AMANU TAMU
sulu o sulugi – kasangkapan bang malyaring mikasala lakwas na king dulum o madalumdum.
paritan o gasera – sulung malati a gagamitanang laru o gas bang mika-aslag. Maralas ating pabelung tela.
kandila – sulung gagamitanang larung makukwa keng lumbang. Pabelung leting o pepakapalan a sinulad ing makabusal.
kandelabra – sulung kandila ing magpaslag. Maralas keng pisamban magagamit lalu na keng dambana o altar.
asag – bakal a sulung gagamitanang alcohol king pabelu a makabusal keng libutad ning lulanan ning gas.
tukil – pangkilwal a suluging gawa keng kapirasung impun kwayan o bulu a makipabelung makababad king laru o gas. Gagamitan da reng king bunduk o dakal a taung anti kareng mayayakit keng sine neng atin lang lulusubang salut o magkukulam.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.