LABING unang higayon sa akong pagkalaagan nga hapit naabtan og 11-oras una naabot ang destinasyon. Sa halos tanan man gud nakong laag, labi pa og sa layo, mag-eroplano gyod ko, diin makuha lamang kini sa dul-an duha ka oras ang pinakalayo nga dapit sa nasud gikan sa Davao City.
Hunyo 17, 2022 sakay sa nindot kaayo nga coaster, usa ka moderno nga bus, uban sa mga kaubanan sa buhat gikan sa Davao City padung sa Diplahan, Zamboanga Sibugay didto sa Zamboanga Peninsula, alang sa usa ka programa sa pag-imbeta sa usa sa mga labing unang kolumnista sa SuperBalita Davao, Emmanuel Roldan.
Sa dalan palang dihay mga pagpahibalo si Sir Emmanuel labot sa kung unsa ang matigayon sa programa, busa nadugangan akong kahibalo, ug tuod man, wala ko batia'g katulgon gumikan sa mga lugar nga una ko pa nga naagian.
Ang wala nakapaduka nako mao ang pagtan-aw sa mga maagian nga lugar sama sa Parang, sa Lanao del Sur ug Lanao del Norte, mga lungsod sa Bangsamoro Region, dungan sa akong gibati nga dunay kabalaka tungod sa mga balita niadto nga maoy giingong usa sa mga gigikanan sa kagubot sa Mindanao ang maong mga dapit; hinuon malinawon gayod among biyahe.
Pagka-ugma, Hunyo 18, mao na ang programa, nakapalihok sa akong mga ngabil diha sa pagpahiyom, sa akong nakita nga mga lumad, diha sa paghatag sa ilang pasundayag gikan sa mabulukon nilang kagikan ug kinaadman sa tribong Subanen.
Pormal nga gibuksan, uban sa tibuok suporta sa lokal nga panggamhanan sa Zamboanga Sibugay ang groundbreaking sa Mount Zynai 0304 Mining Corporation (MZMC) nga gitukod diha sa Mount Zynai Industrial Park sa Barangay Sta. Cruz sa Diplahan.
Usa sa mga halandong bisita mao si National Security Adviser Sec. Hermogenes Esperon Jr., nga giabi-abi pag-ayo ni MZMC President/Chief Executive Officer Leonardo A. Fernandez.
Si Esperon namulong nga ang katukoran sa MZMC usa ka dalan nga mobarato na unya ang presyo sa bakal sa nasud tungod dili na moangkat ang Pilipinas sa ubang kanasuran og mga materyales sa paghimo niini, tungod mismong ang MZMC na ang mga prodyus niini alang sa Mount Zynai Integrated Steel Mill & Smelting Plant.
Sumala ni Esperon nga paneguraduhon lamang sa MZMC nga kinahanglan maampingan ang kinaiyahan, mahatagan og dugang serbisyo ang katawhan ug ang pagpabiling usa kini ka dalan alang sa paglambo sa lugar, luyo sa kamatuoran nga ang dapit dunay dako nga deposito sa iron ore ug limestone nga maoy mo-prodyus sa 'pig iron' o gitawag sab kini og 'crude iron' nga maoy intermediate product sa iron industry sa produksyon sa steel nga makuha pinaagi sa smelting iron.
Giingon sa CEO nga si Fernandez nga ang 15-hectare facility Steel Mill and Smelting Plant maoy usa sa mga dalan nga mas molambo pa ang dapit, daghan og mahatagan og kahigayonan sa trabaho ug alang sa maayong kaugmaon sa mga nagtubong Subanen sa Diplahan ug sa mga kasikbit nga lungsod, pinaagi sa pagpatukod og mga gambalay, mga ospital ug mga pagpalambo nga ang tanan makahimulos.
Tungod niini, hayan mokubos ang presyo sa bakal nga maoy pinakamahal labi pa diha sa pagpatukod og balay ug gambalay; miubos ang presyo kay di naman moangkat sa laing nasud sama sa China ug Indonesia og mga materyales sa paghimo niini.
Manghinaut kita, ubanan sa pag-ampo nga malampuson ang katukoran sa maong planta, ug giyahan ang mga nagdumala niini uban sa mga dagkong investors nga sa kanunay ma-sentro ang tulo ka mga nag-unang ikonsidera; ang alang sa kalamboan sa dapit, paghatag og dugang serbisyo ngadto sa katawhan ug ang labaw sa tanan ang pagpangga sa kinaiyahan.