TUMAL ang pamasahero, kini maoy unang nabutyag nga hinungdan ning usa ka pedicab driver sa Barangay San Miguel, Digos City nga nahimo niya ang pagpaninda og ilegal nga druga.
Bisan pa man sa pasangil sa suspek nga si Reyland Montemayores alyas Rey, 32, taga Purok Arwana, Lim Extension, Barangay San Miguel, Digos City, giposasan kini sanglit ilegal.
Ang suspek nasikop human nakigkoordinar sa kapulisan nga mobaligya og shabu, hinungdan nga gikasa ang usa ka buy-bust operation.
Sa pagpanguna ni Police Lieutenant Diosdado Niones ubos sa superbisyon ni Police Lieutenant Colonel Hamlet Lerios, hepe sa Digos City police, nasikop ang suspek alas 3:30 sa hapon, Hunyo 24, 2022, didto sa Purok Bayanihan, Barangay San Miguel.
Usa ka pakite sa gituohang shabu, selpon ug marked money ang nakuha gikan sa posisyon sa suspek kinsa napasakaan na og kaso didto sa korte.