Seguradong andam na sa ilang gambalay sa pagdumala sa paghulip sa bag-ong administrasyon ug ang nasubli sa pagkapili sa posisyon niadtong Mayo 9, 2022 nga nasudnon ug lokal nga eleksiyon nga gikatakda nga opisyal nang molingkod sa gahom karong Huwebes, Hunyo 30, 2022.
Nag-una sa molingkod sa gahom mao si Presidente-elect Ferdinand ‘Bongbong’ Marcos, Jr. ug Vice Presidente-elect Sara Duterte-Carpio. Ang duha kauban og partido sa eleksiyon ug parehong ningkuha og taas nga boto. Bisan sila kaalyado apan, ang ilang liderato sa nasod nag-atubang og dakong hagit.
Usa sa ilang nag-unang atubangon mao ang pagsutoy matag semana sa presyo sa mga produkto sa petrolyo.
Ugma, Hunyo 28, dunay hugonhugon sa laing pag-umento sa pump prices sa lana. Mokapin na kaha sa P100 ang presyo sa diesel o gasolina? Kon mahitabo, mosamot na usab ang kalisod sa katawhan.
Ang presyo sa lana maoy nag-unang hinungdan sa pagmahal sa mga nag-unang palaliton (pagkaon) ug serbisyo. Gitawag sa mga ekonomista nga ‘domino effect’. Samtang, ang bili sa kuwarta sa nasod mikunhod ngadto sa P54.00 batok sa usa ka US dollar. Dili kini bag-ong problema sa nasod.
Nasayod kita nga dili kini masulbad sa usa ka pagpamilok sa mata sa bag-ong mga opisyal. Apan sa ilang paglingkod sa posisyon, dili nato lung-an sa pagpahinumdom sa ilang saad sa kampanya sa miaging eleksiyon sa pagsulbad sa mga problema sa nasod ug motimon sa ekonomiya.
Layo pa kita sa sitwasyon sa Sri Lanka nga nideklarar nga bangkarota na. Gipangsuspenso ang daghang serbisyo sa maong nasod sama sa mga klase sa tunghaan. Apan ang bag-ong liderato dili mokompiyansa.
Uban sa atong pag-ampo nga dili mahisama sa Sri Lanka ug kooperasyon, hiniusang makalabang kita sa dakong krisis sa ekonomiya ug makab-ot ang tam-is nga kalamboan.
Apan kinahanglan nga ang diskarte sa mga bag-ong opisyal makita dayon ning sayo pa sa ilang paglingkod sa gahom.