Usa ka 20-anyos nga dalaga nasagmuyo sa iyang inahan human wala modapig sa iyang reklamo nga gilugos sa manghod sa iyang stepfather.

Ang pagsuway og lugos nahitabo sa alas 10:56 sa gabii niadtong Biyernes, Hunyo 24, 2022 sa ilang balay sa Sitio Sinsin, Barangay Bato, dakbayan sa Toledo.

Si Ana (dili tinuod ngalan), 20, dalaga, college level, ug nagpuyo sa nahisgutang lugar, nangayo og abag sa kapulisan uban sa iyang uyab.

Ang suspek nga si Junior (dili tinuod ngan), 21, ulitawo, ug taga Barangay Tinubdan, lungsod sa San Fernando, nasikop sa follow-up operation, ala 1:30 sa kaadlawon sa Sabado, Hunyo 25, 2022.

Ang ngan sa suspek gipugngan usab ning mantalaan human wala makuha ang iyang habig sa alegasyon.

“Subo kaayo kay ang inahan niya tua molaban sa suspek nga manghud sa iyang stepfather. Giingnan siya sa inahan nga isibog ang kaso,” matod ni Police Senior Master Sgt. Violeta Godinez sa Women’s and Children’s Protection Desk (WCPD) sa Toledo Police Station nga nahinabi sa Superbalita Cebu kagahapon, Hunyo 26, 2022.

Ang biktima mibutyag sa kapulisan nga diha siya sa ilang lawak nagduwa sa iyang selpon, nagtan-aw siyag video ug kalit nga misulod ang suspek ug nitupad sa paghigda.

Apan paglabay sa 5 minutos, dugang sa biktima, nabantayan niya nga dunay kusog kaayong mipisik sa iyang sampot ug sa iyang paglingi, nakita ang suspek nga nagduwa sa iyang kinatawo hinungdan nga nakurat ug nibarog.

Dason sa biktima, gikuptan sa suspek ang iyang wala nga kamot ug dayon gitabunan iyang baba dayon gikumotkumot ang iyang dughan ug gihuboan sa iyang underwear dayon gilugos.

Bisan pa man kon nilampos ang suspek sa gihimo niini, nakalingkawas gihapon ang suspek ug nidagan paggawas sa ilang panimalay.

Ang biktima mitawag sa iyang uyab nga si George ug gi-report sa kapulisan.

Sila si Police Staff Sgt. Florante Narandan ug Police Staff Sgt. Rolando Tampip mao ang ninghimo sa follow-up operation ug malampusong nasikop ang suspek.

Si Godinez nagkanayon nga kasong rape ang ipasaka sa suspek karong adlawa, Hunyo 27, human nakumpleto nila ang mga dokumento lakip sa resulta sa paghiling sa biktima sa Pink Room sa Vicente Sotto Memorial Medical Center (VSMMC).

Bisan wa modapig ang inahan, sumala ni Godinez, ang biktima gisuportahan sa iyang uyab ug sa Department of Social Welfare and Development (DSWD).