Makabalik ra sa pag-operate ang tulo ka gasoline stations nga gi-padlock ang gas pumps human masuta sa gihimong kinalit nga inspection sa kapulisan sa siyudad sa Sugbo ug sa kagamhanan sa dakbayan nga wala kini ma-calibrate sa miaging semana.
Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), walay tagal kon kanus-a ipa-recalibrate sa maong mga kompanya sa lana ang ilang gas pumps nga kuwang sa sukod.
Iyang gipasabot nga hugot kini nga gibantayan sa kapulisan ug sa Prevention, Restoration, Order, Beautification and Enhancement (Probe) team nga dili mahilabtan ang ilang gas pumps kon wala pa nila ma-settle ang mando sa kagamhanan sa siyudad sa Sugbo.
Ang tulo ka gas stations nga wala lang una nganli ning mantalaan samtang wala pa sila moluwat og pamahayag.
Giingong makamulta ang kompanya og tag P1,000 kada gas pumps nga wala ma-calibrate ug gimandoan usab sila nga mopasabot sa city hall labot sa kalapasan nga ilang nahimo.
Samtang, gihuwat pa usab sa kapulisan ang resulta sa gihimong inspeksyon sa norte nga bahin sa siyudad sa Sugbo nga adunay daghang gasoline stations.
Karong adlawa, Lunes, Hunyo 27, 2022 mopagawas na usab ang Probe team ug CCPO sa resulta sa ilang pag- susi sa tanang gasolinahan sa norte.
Nidugang si Parilla nga wala silay nakita nga problema sa dagkong oil players sama sa Shell, Caltex ug Petron sanglit updated man ang calibration niini matag adlaw sa tanan niini nga gas pumps.
“Way problema sa dagko nga player according to Mam Raquel Arce. Ang dagko nga mga gasoline stations walay problema, murag naa silay kaugalingon nga calibration nga himuon nga everyday constant nila nga ipa-check ang ilang gas pumps,” matod ni Police Lieutenant Colonel Wilbert Parilla.
Gitinguha ni Cebu City Mayor Michael Rama nga ning pagsulbong sa presyo sa krudo ug gasolina sakto ang madawat sa mga motorista ug dili kini mapahimuslan.