Kapin sa P105 milyunes nga balor sa shabu ang nasakmit sa Police Regional Office (PRO) 7 ug pito ka high-value drug personalities ang nasikop sa managlahing drug operations sa Central Visayas (CV) sa Sabado, Hunyo 25, 2022.

Sa Bacong, Negros Oriental, ang joint operating teams sa Dumaguete Maritime Police, ug Bacong Municipal Police Station ninglusad og buy-bust operation sa alas 12:42 sa kaadlawon ug nasikop ang usa ka high valued individual.

Si Major Fortunato Villafuerte, team leader sa Bacong Municipal Drug Enforcement Unit Operations, niila sa suspek nga si Crisanto Ang Sayre, 42, taga Sitio Canday-ong, Brgy. Calindagan, Dumaguete City, Negros Oriental.

Nakuha gikan sa posisyon ni Sayre ang shabu nga 200 gramos nga dunay street value nga P1,360,000 ug drug paraphernalia.

Sa Talisay City, duha ka high-value personalities ang nasikop sa Talisay City Police sa managlahing buy-bust operations sa Talisay Drug Enforcement Unit.

Si Lieutenant Elwood Ebona, hepe sa DEU sa Talisay Police Station, niila sa mga dinakpan nga sila si John Maverick Gabisay, 20, taga Sitio Tunga, Brgy. Tangke ug May Faith Bacus Vinculado, 25, taga Sitio Kilawan, Brgy. Tangke.

Sa ala 1:28 sa hapon, si Gabisay nasikop sa Sitio Tunga, Barangay Tangke samtang si Vinculado sa Sitio Sawsawan, Barangay San Roque sa dakbayan sa Toledo, Cebu sa alas 4:05 sa hapon.

Gibanabana nga 150 gramos ang nasakmit gikan sa mga suspek nga dunay street value nga P1,020,000 ug drug paraphernalia.

Samtang sa Dasuna Brgy. Das, Toledo City, ang operatiba sa Toledo City Police nihimo og buy-bust sa alas 4:45 sa buntag.

Si Master Sergeant Leodines Leduna, team leader sa Drug Enforcement Unit sa Toledo City Police Station, niila sa mga suspek nga sila si John Roderick Autencio Sollano, 42, ug Rutchen Baliguat Buglosa, 39, pulos taga Dasuna, Brgy. Das, Toledo.

Ang duha ka high-value individuals nakuhaan og 100.12 gramos sa shabu nga dunay street value nga P680,816 ug drug paraphernalia.

Sa Brgy. Poblacion, Lapu-Lapu City, alas 10:15 sa buntag, nasikop sa follow-up buy-bust sa teams ang duha ka high-value individuals.

Si Major Joey Bicoy, team leader sa Drug Enforcement Unit sa Lapu-Lapu City Police Office, niila sa mga suspek nga sila si Bacalso Felisilda, 46, taga Block 13, Lot 23, Rosa Street, Ilang-ilang, Lindaville Subd., Tagbilaran City, Bohol, ug James Plaza Vallesquina, 28, taga Langkaan, Dasmarinas, Cavite.

Nasakmit ang 15,000 gramos sa shabu nga dunay street value nga P102,000,000 ug drug paraphernalia.

Si PRO 7 Director Police Brigadier General Roque Eduardo Vega nidayeg sa kalamposan sa kapulisan.

“Mapipilayan na sila ngayon dahil unti-unti ng bumabagsak sa kamay ng pulisya ang mga tao o grupo na responsable sa ilegal na mga kalakalan ng droga dito sa Kabisayaan. Hahabulin ko kayo at wala kayong kawala sa batas,” matod ni Vega.