Usa ka 41-anyos nga suspek sa pagpayuhot sa gidiling druga ang napatay sa buy-bust sa Brgy. Hilasgasan, lungsod sa Barili niadtong Sabado, Hunyo 25, 2022.
Si Staff Sergeant Jeffrey Alpas, desk officer sa Barili Municipal Police Station, niila sa suspek nga si Givanni Cañete Estrada, 41, taga Barangay Hilasgasan, Barili.
Si Major Janus Giangan, acting chief sa Barili MPS, maoy nangulo sa buy-bust batok kang Estrada uban sa pag-abag sa Philippine Drug Enforcement Agency sa Central Visayas (PDEA) 7.
Matod ni Alpas, alas 11:45 sa buntag sa Hunyo 25, 2022, si Staff Sergeant Tirso Berjolano maoy nagpakaaron-ingnon nga mopalit og gidili druga sa balay ni Estrada.
Dihang mopalit na unta si Berjolano, si Estrada nakamatikod nga pulis ang iyang nakatransaksiyon ug nikuha kini sa iyang armas aron pagpusil sa naulahi.
Apan ang Barili operating team nga nagsuporta sa operasyon, maoy nipusil sa suspek.
Si Giangan nagkanayon nga ang kamatayon ni Estrada resulta sa pinusilay.
Nakuha nga ebidensiya sa kapulisan mao ang 15 ka plastic sachets sa giingong shabu nga nitimbang og 10.65 gramos nga dunay street value nga P72,420, P500 marked money, P800 ug drug paraphernalia.
Samtang, ang pamilya ni Estrada niadto sa police station apan wala mosanong sa pagpa-autopsy sa lawas suspek.
“Niingon ang pamilya nga dili na sila mo-execute og waiver kay para dili nalang ipa- autopsy ang patayng lawas sa maong kapamilya nila,” matod ni Alpas.