GIPASALIG ni Davao City Mayor-elect Sebastian "Baste" Duterte ang mga Dabawenyo nga mahuman dayon niini ang High Priority Bus System (HPBS) alang sa moderno nga transportasyon sa taga siyudad sa Davao.
Kini maoy usa sa iyang mga gibutyag atol sa iyang inaugural speech kagahapon atubangan sa mga Dabawenyo gawas sa City Hall of Davao.
"The preparation of the High Priority Bus System is now in full swing and the city will double its efforts for the fast completion of this project, Dabawenyos is soon to enjoy a modern and efficient transport system that does not only provide comfort but also space economic growth," tipik sa mensahe sa batan-ong Duterte.
Giingon niya nga ang HPBS usa ka inisyatibo ni outgoing Mayor ug karon Vice President-elect Sara Duterte.
"Kining HPBS mao ni ang binuhat ni Mayor Inday Sara Duterte," niya pa nga sumpay sa iyang pamulong.
Sa sayong bahin ning tuiga, si VP-elect Duterte miingon nga plano nila nga ipadayon ang bidding alang sa ubang mga component sa proyekto nga naglakip sa 1,000 ka units alang sa mga bus fleets nga naglakip sab sa labing menos 300 ka electric 18-meter buses.
Ang depot sa mga electric bus kabahin sa Contract Package 4 sa HPBS, sumala sa Pre-Bid Conference Presentation sa Department of Transportation (DOTr). Ang Sasa sa amihanan ug St. Nino sa habagatan maoy magsilbing mga depot niini.
Dugang pa, gilauman nga ang mga electric buses magsilbi nga mga rota sa sentro nga distrito sa negusyo sa siyudad base sa presentasyon sa DOTr.
Samtang, ang kombinasyon sa diesel ug electric bus fleets maghatag og serbisyo alang sa HPBS 29 nga mga rota, nga mokabat sa 672 kilometros sa rota nga network niini.
Gawas niini, gihimug-atan sab sa bag-ong mayor ang mga butang sa pagpaneguro nga molambo pa ang siyudad sa Davao ug aron makahimulos ang daghang mga Dabawenyo, dungan sa iyang makanunayon pagpasalamat diha sa pagsalig kaniya.
Human sa iyang inaugural speech, gilayon kining midiretso sa Sangguniang Panlungsod Building alang sa oathtaking ceremony diin asa naa didto naghulat ang iyang pamilya ug mismong si outgoing President Rodrigo Duterte.
Namulong sab ang Pangulong Duterte kinsa nagpasalamat sa pagsalig kaniya sa mga katuigan nga siya ang pangulo sa nasud. Nagpasalamat sab si PRRD sa tibuok nga pagsalig kang Mayor Baste nga maoy modala na sa siyudad sa Davao. (Uban sa taho ni Krizzy Daugdaug)