Milusad na og lapad nga manhunt operation ang kapulisan sa probinsya sa Sugbo batok sa 23 anyos nga lalaki nga nitulis ug nidunggab patay sa iyang iyaan ug niangol sa lain nga kabanay niadtong Dominggo sa alas 2:55 sa hapon, Hunyo 26, 2022, sa sitio San Juan Purok 3, barangay Bonbon, lungsod sa Aloguinsan, Sugbo.
Ang suspek nga si James Harvey Nengasca, 23, nagpuyo ra usab sa dapit, nieskapo human niya napatay ang iyang iyaan nga si Arsenia Nengasca Alidani, minyo, ug niangol kang Belen Nengasca Biton, 53, minyo.
Si Arsenia nakaangkon og daghang mga samad dinunggaban sa lawas gamit ang gunting nga niresulta sa iyang hinanali nga kamatayon samtang samaran usab sa ulo ug pipila ka bahin sa lawas si Belen. Ang gunting nakuha sa suspek gikan sa tailoring ni Arsenia.
Matod ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO), nga positibong giila sa mga saksi si James Harvey. Usa mga saksi ang menor de edad nga gikasugat sa suspek nga nagbitbit pa sa gunting nga maoy gigamit sa pagpatay.
Sa nakuha nga kasayuran sa kapulisan, tiggamitan sa illegal nga drugas ang suspek base sa pamahayag sa mga kabanay niini.
Gani makita kini sa iyang gihimo ngadto sa mga biktima nga iyang mga iyaan nga linuog ang gibuhat.
“I received a reliable information the subject is a drug user, and we received information also na naa gyud siyay balak nga manguha, kay kining suspect relative ra sad ni sila sa mga biktima. If you happened to see the photos, linuog gyud ang pagpatay, dili siya mahimo sa usa ka normal nga tawo,” matod ni Sucalit.
Gipakatap na ang hulagway ni James Harvey sa tanang mga police station sa probinsya sa Sugbo aron maalerto ang kapulisan kon makit-an.
Niawhag ang CPPO sa suspek nga aron mahimong luwas ang kinabuhi, labing maayo nga motahan na lang ug dili mosukol.
“Akong giawhag ang mga pamilya aning atoang suspetsado. Identified naman ni si James Harvey Nengasca, nga mo surrender na siya nga dili mosukol sa atoang kapulisan para peacefully masulbad ang kaso para mahatagan sad og hustisya ang kamatayon sa biktima,” matod ni Sucalit.
Si Arsenia giingong gikan nisimba sa wa pa ang hitabo pasado alas 2 sa hapon.
Si Biton nakadungog og lagubo sa sulod sa balay nga gihimong grocery store ug tailoring busa iyang gisusi.
Iyang nakaplagan si Arsenia nga nagbuy-od nga daghan og mga samad dinunggaban.
Kalit siyang gidunggab ni James Harvey nga diha sa iyang likod, tumong sa ulo ug ubang bahin sa lawas.
Nakiglayog siya sa suspek hangtod nga nakalingkawas siya ug nakapangayo og panabang. Nadala sa suspek ang P5,000 gikan kang Arsenia. (dugang taho ni GPL)