PASPAS nga na-rescue sa Urban Search and Rescue (Usar) team sa Central 911 ang unom ka mga bata nga na-trap sa sapa sa Purok 2, Sitio Balengaeng, Tugbok District, Davao City.
Sa impormasyon nga nakuha sa Superbalita Davao, dali nga na-rescue ang mga nahisgutan human nga narespondehan gumikan sa post sa Facebook sa mismong iyaan sa mga bata nga si Dimps Cansana.
Dugang nasayran nga giingong nananghid ang mga bata nga mangaligo sa sapa, apan wala kini gitugtan sa ilang mga ginikanan.
Bisan pa man, nagmagahi ang mga bata ug sekreto kining nagsabot aron mangaligo.
Taliwala sa ilang pagpangaligo, kalit suma pa mikusog ang bul-og sa tubig sa sapa nga adunay sagol nga lapok hinungdan nga dali dayon silang nanindog sa dakong bato nga anaa sa tunga sa sapa.
Sa video nga gi-post ni Cansana, makita nga nanghilak na ang mga bata nga anaa nagtungtong sa dakong bato diin dili na sila kaadto sa mala gumikan sa kakusog sa bul-og sa tubig.
Hapit pa usa ka oras una naluwas ang maong mga bata.
Sa samang hitabo, dunay duha sab ka mga bata ang na-trap sa Lipadas River sa Manambulam, Davao City subay sa post sa Team Davao Rescue.
Sa pagsuwat ning balita wala pa'y impormasyon nga gipagula kung unsay update sa duha ka bata sa Lipadas River.
Ang pagkusog sa bul-og sa tubig sa sapa gumikan sa walay hunong nga bunok sa ulan sa taas nga bahin sa maong mga lugar niadtong Lunes sa gabii, Hunyo 27, 2022.
Nagpahimangno ang awtoridad nga magmabinantayon labi na sa mga namuyo daplip sa mga sapa sa Davao City.