Nagplano ang Kagamhanan sa Dakbayan sa Mandaue nga mohatag og laing cash assistance ngadto sa mga sakop sa sektor sa transportasyon taliwala sa padayong pagsaka sa presyo sa gasolina, matod sa usa sa mga opisyal.
Si City Administrator Atty. Jamaal James Calipayan nitug-an sa SunStar Cebu sa Lunes, Hunyo 27, 2022, nga naningkamot sila sa pagpangita og dugang mga paagi aron matabangan, ilabina ang tricycle drivers ug operators sa dakbayan, sa padayon nga pagsaka sa mga produktong petrolyo. Usa na niini ang paghatag og dugang cash subsidy, nga ilang gikinahanglan aron mabuhi ang mga drayber.
“They (drivers) need cash because of the increasing fuel prices. That is the number one thing we are trying to work on because the increase directly affects their profits and income,” matod ni Calipayan.
Ang mga produkto sa petrolyo sa Pilipinas sa pagkakaron anaa sa P92 matag litro sa diesel, P87 matag litro sa gasolina, ug P92 matag litro sa kerosene.
Sa sayo pa, ang Dakbayan sa Mandaue niingon nga ilang ipang-apod-apod sa usa ka higayon ang cash assistance nga nagkantidad og P5,000 matag usa alang sa 957 ka lehitimong mga drayber ug operator sa traysikol isip fuel subsidy.
Ang kuwarta patas nga bahinon sa upat ka mga sona (ruta) sa siyudad. Adunay mga 169 nga makadawat sa Zone 1, 430 sa Zone 2, 125 sa Zone 3, ug 233 sa Zone 4.
Kini iapud-apod sa Mandaue City Sports and Cultural Complex gikan sa Hunyo 30 hangtod Hulyo 1. Sukwahi sa naunang pahibawo nga dul-an sa 1,700 ka benepisyaryo ang adunay katungod sa pag-claim sa hinabang, giklaro ni Calipayan nga ang listahan nagpakita nga 957 lang ang benepisaryo kay posibleng wala pa nahuman sa City Treasurer’s Office.
Ang Kagamhanan sa Dakbayan nag-andam og cash aid subay sa ordinansa sa Siyudad, nga gitumong sa paghatag og pinansyal nga tabang niadtong trike drivers ug operators nga adunay prangkisa (expire o aktibo) sukad sa Marso 20, 2020.