Lisod sabton ang gihimo karon sa mga ‘tamjun’ (taman sa June) nga mga taas nga opisyal sa Bohol sama kang Gov. Art Yap ug Vice Governor Rene Relampagos.
Pinaagi sa usa ka resolusyon, nidonar ang Kapitolyo og computer ug printer units ngadto sa usa ka non-government organization (NGO).
Pinaagi sa laing resolusyon, nidonar usab sila sa mga audio-video and communications equipment nga gigamit sa Office of the Governor ngadto sa lain nga NGO.
Buyno, mahimo nila kini kay hangtod Hunyo 30 pa man ang ilang termino.
Pero, husto ba kaha kini?
Unsa may epekto niini sa pagpadagan sa kalihokan sa opisina sa gobernador, labi na kay pulihan na man kini sila?
Nganong karon ra man nila kini gihimo? Kon tan-awon sa resolusyon, sa miaging tuig pa man diay kining NGO nga nagpadala sa ilang sulat-hangyo?
Duna bay mahimo ang bag-ong napili nga mga opisyal nga mapugngan ang maong mga kalihokan?
Ngano man? Kay kon mahimo nila kini nga buhaton sa mga computer and communications equipment, mahimo sab nila kini buhaton sa bisan unsang mga butang nga gipanag-iya sa Probinsiya.
Unya duna pa gyod lain.
Mga kitchen utensils and equipment sa opisina sa gobernador gi-turn-over sab sa laing opisina nga sakop ra sa opisina sa gobernador pinaagi sa laing resolusyon.
Daghan ang natingala sa gihimo sa tamjun nga mga opisyal.
Maayo ba ang ilang katuyoan o usa ka tinunto?
Buyno, dili hinuon kini awtomatik nga mahimo dayon. Taastaas nga proseso ang agian basta gobiyerno na ang hisgotan.
Manghinaot lang kita nga walay hukos-pukos nga nagpaluyo sa maong kalihokan. Kay kon duna man, maghatag lang kini og kalisod sa bag-ong mga opisyal nga molingkod sugod karong Hulyo 1.