Suspek sa pagtulis ug pagpatay sa babayeng negusyante ug pagkaangol sa kabanay sa lungsod sa Aloguinsan sa Dominggo sa hapon, Hunyo 26, 2022 nadakpan sa Miyerkules sa udto, Hunyo 29, 2022 sa hiniusang pwersa sa kapulisan sa probinsya sa Sugbo sa Barangay Lagtang, Siyudad sa Talisay tulo ka mga adlaw human sa krimen.
Ang nasikop giila nga si James Harvey Nengasca, kinsa gialarma nga armado sa Barangay Lagtang.
Matod ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CCPO), nakadawat og impormasyon ang kapulisan nga adunay armadong tawo sa maong barangay nga nihaom sa hulagway sa suspek sa pagpatay sa Barangay Bonbon, Aloguinsan.
Gilusad dayon ang operation uban sa Talisay City PNP ug Aloguinsan Police Station nga miresulta sa pagkasikop ni Nengasca.
“Una, Sir, naka-received tag alarma nga naay pusil ba ang usa ka tawo sa Talisay. Mi fit na sa description pud sa atoang suspect sa pagpatay katong biktima sa Aloguinsan. Diha-diha niana, Sir, nagkasa tag team sa Talisay ug ngari sa headquarters para pagresponde immediately. Indeed nakuhaan gyud nato og armas,” matod ni Sucalit.
GIUNSA OG SIBAT
Gitug-an ni Sucalit nga human nahimo ni Nengasca ang krimen, siya nisibat sa lungsod sa San Fernando ug nibalhin sa Lagtang pagka Martes Hunyo 28, 2022, pinaagi sa pagsagol sa mga tawo.
Apan siya nabantayan nga naay giluklok nga armas sa hawak ug nakamay-ong usab sila sa dagway nga sama sa hulagway nga mikatap sa social media nga maoy nipatay sa iyang iyaan sa Aloguinsan busa gi-report dayon siya sa kapulisan.
Gipasalamatan ni Sucalit ang suspek nga wala nisukol bisan kon armado, apan iyang gihulagway nga klaro kaayo nga high kini sa illegal nga drugas.
Tungod sa pagkasikop, gikonsidera na nila karon nga sulbad na ang pagpatay kang Arsenia Nengasca Alidani, ingon man ang pagbunal ug pagdungab kang Belen Nengasca Biton, kinsa naa pa sa tambalanan.
“Kaluoy sa Ginoo, Sir, nahatagan gyud nato og hustisya ang biktima sama sa akong gisulti gahapon. Gikaluy-an gyud ta sa Ginoo,” dugang ni Sucalit.
TUNGOD SA SABONG
Sangko sa langit ang pag basol ni James Harvey nga iyang nahimo ang krimen ug nagtuo siya nga dili na siya mapasaylo pa.
Apan bisan pa niini iyang gipangayo ang kapasayloan sa iyang sala sa iyang duha ka mga iyaan, labi na sa namatay.
“Pasayloa ko, Tiya, walay kapatawaran ning akong nabuhat. Tungod gyud ni sa sugal,” matod niNengasca.
Giangkon niya nga niadto siya sa tindahan sa iyang iyaan aron manghuwam og kwarta nga P5,000 sanglit napilde siya sa sabong.
Wala niya tug-ani nga iyang ibayad sa iyang pildi sa sugal sanglit nasayod man siya nga masuko kini apan wala siya pabayloa sa iyaan.
Dinhi na, matod pa, nasuko na siya ug iyang nahinaykan ang negosyante pinaagi sa pagdunggab sa makadaghang higayon gamit ang gunting sa tailoring.
“Nadala ko sa barkada, nadala ko sa tari, sabong napilde ko. Nihangyo ko nga mouli ko aron manghuwam ko ni Tiya. Wala ko mosulti nga napilde ko, mo huwam unta kog P5 mil,” dugang ni Nengasca.
Gihimakak hinuon niya nga sila ang nagbuhi sa iyang pamilya apan iyang gitug-an nga dili sila suod nga kabanay.
Giandam na ang kasong murder ug frustrated murder lakip na ang laing kaso nga illegal possession of firearm nunot sa nakuhang armas sa iyang posisyon.