Amahan ug anak nga gikiha og unom ka mga kasong pagpanglugos sa 16 anyos niyang stepdaughter nagkauban na og selda human sila nadakpan sa mga sakop sa Criminal Investigation and Detection Group (CIDG) Lapu-Lapu City Field Unit sa pagpangulo ni Police Captain Nigel Sanoy.
Unang nadakpan sa Lunes Hunyo 27, 2022 ang anak niini nga si alyas Eddie, 20, sa sitio Camansi, Barangay Pajo, Siyudad sa Lapu-Lapu nga adunay warrant of arrest sa lima ka mga kasong pagpanglugos.
Gilusad usab sa CIDG ang follow up operation sa Martes sa hapon Hunyo 28, 2022 ug nadakpan usab ang amahan niini nga si alyas Eric, 38, sa PUV terminal atbang sa Metro Mall sa Barangay Pajo human ni nalutsan og warrant of arrest sa unom ka mga kasong pagpanglugos sa iyang humagbos sulod sa duha ka tuig sugod sa 16 anyos pa ang dalaga.
Ang warrant of arrest giluwatan ni Judge Jose Alfonso Maliper Gomos, presiding judge sa Family Court Branch 5 sa dakbayan sa Lapu-Lapu.