Ang Regional Tripartite Wages and Productivity Board (RTWPB) sa Central Visayas nakadawat na og laing duha ka aplikasyon sa mga kompaniya nga dili makapatuman sa P31 nga usbaw sa suholan matag adlaw sa ilang mga empleyado nga nagdawat og minimum nga sweldo.
Kini ang gipahibawo ni Atty. Evita Mendoza-Balane, officer-in-charge (OIC) Board Secretary sa RTWPB 7 human adunay duha ka korporasyon nga nagbase sa dakbayan sa Sugbo ug may mga sangang buhatan sa Mandaue City, Lapu-Lapu City ug ubang lugar sa lalawigan sa Sugbo ingon man ubang probinsya sa Central Visayas nga nanghangyo niini.
Gitug-an usab ni Balane nga ang unang kompaniya nga nakaduso sa ilang application for exemption nga nagbase sa Lapu-Lapu City, nahisgotan na sa Board meeting sa RTWPB-7 ug buhatanan na lang og resolution kon aprobahan o isalikway ba ang ilang aplikasyon.
Matod sa opisyal sa RTWPB 7 nga wala pay petsa sa pagdungog ang application for exemption sa duha ka korporasyon nga niduso sa ilang mga dokumento, apan posibleng mahisgotan sa sunod nga Board meeting.
Aduna nay tsansa nga lahi na ang chairman sa RTWPB-7 sanglit paingon tapos na ang termino ni Presidente Rodrigo Duterte ug ang OIC sa Department of Labor and Employment nga si Undersecretary Victor Del Rosario posible nga mahulipan.