TUNGOD sa pagpakabana sa katawhan sa komunidad napuhag ang giingong drug den sa Purok 1, Matti, Dakbayan sa Digos pasado alas 8 sa gabii, Hunyo 27, 2022.

Nasakmit sa mga personahe sa Philippine Drug Enforcement Agency (PDEA) Davao del Sur, Davao del Sur Provincial Drug Enforcement Unit ug Digos City Police Station ang mga gituohang shabu nga mokantidad og P255,000 atol sa gihimong buy-bust operation.

Giila ni PDEA-Davao director Aileen Lovitos ang target sa operation nga si Mark Vicera, alyas Agaw, 37-anyos, truck driver.

Napalitan og usa ka pakite sa gituohang shabu nga kantidad og P1,000 ang suspek hinungdan nga dali kining giposasan.

Atol sa operasyon, naaresto sab ang iyang igsuon nga si Benjie Vicera ug ang ilang pag-umangkon nga si Bradly Luis Amir.

Nakumpiska ang unom ka mga pakite sa gituohang shabu nga motimbang og 17 gramos ug mga drug paraphernalia.

Gikustodiya na ang mga suspek sa Digos police.