LALAKI napatay isip resulta sa espiritu sa ilimnong makahubog human nga gitabangan kini'g dunggab sa mga gikatagay niini alas 9:20 sa gabii, Hunyo 26, 2022, didto sa Lower Madapo, Purok 10-B, Barangay 8-A, Davao City.

Ang biktima nailhang si Christopher Cang Andal, 34-anyos, residente sa Purok 2, Magallanes, Brgy. 2-A, Davao City samtang ang duha ka suspek nailhang sila Anwar Salinawa, 30-anyos, taga Cotabato City, ug si Emily Macatunao Ayao, taga Purok 10-B, Lower Madapo, Barangay 8-A, ning siyudad.

Nasayran nga nakita pa sa testigo ang tulo nga nag-inom dihang taud-taod nagkalalis nga misangko sa pagpangdunggab.

Giingong gitabangan og dunggab sa mga nahisgutang suspek ang biktima hangtud kini nalup-og.

Nadala pa sa Southern Philippines Medical Center ang biktima apan gideklara kining dead on arrival.

Usa ka hot pursuit operation karon ang gihimo sa kapulisan aron masikop ang mga suspek.