F2F classes sa Cebu City

Hulagway kuha ni Ivan Rey Tan
Hulagway kuha ni Ivan Rey Tan

Ang tanang ang-ang sa mga tunghaan sa dakbayan sa Sugbo makahimo na sa pagpahigayon sa full face-to-face (F2F) classes human si Mayor Michael Rama nilagda sa Executive Order (EO) 164 nga nagtugot niini kagahapon, Hunyo 29, 2022.

Ang EO 164 ni Rama nitugot sa F2F classes apan ubos sa estriktong minimum public health protocol.

Kini naglakip sa pagsul-ob og face mask, physical distancing, temperature check sa pagsulod, kanunay nga pagpanghunaw o mogamit og disinfectant, ug sayong pagsumbong sa flu-like symptoms.

Si Atty. Collin Rosell, executive secretary ni Rama, nibutyag ngadto sa mga reporter nga ang mga tunghaan ug unibersidad mag-umol og guidelines nga sundon aron pagseguro sa klase nga mapahigayon nga safe and reasonable accommodation capacity.”

Dugang ni Rosell, ang mga tunghaan mokoordinar sa city health department sa paghimo sa guidelines o lagda.

“Ang face-to-face classes, sumala na sa gihangyo sa daghan kaayo nga unibersidad labi na ang mga private sector nga educational institution nibisita sa mayor. Kini ang tubag ug agi’g pagsuporta para sa maayo nga edukasyon ngadto sa atoang estudyante,” matod ni Rosell.

Ang EO 164 nag-awhag sa mga tinun-an, magtutudlo, ug staff sa tunghaan nga magpabakuna batok sa virus.

Dunay special vaccination days alang sa mga tunghaan ug unibersidad nga pagahimuon sa kasayon sa mga tinun-an nga mabakunahan.

“School clinics must make all the necessary preparations in line with the Covid 19 vaccination program including the conduct of special vaccination days for schools and universities in the City of Cebu,” tipik sa EO.

Dugang sa EO 164, “Clinic personnel shall identify and monitor the risk factors which may compromise the learning environment and to design measures to eliminate the same.”

Si Rosell nipaklaro sa paggamit sa EO 164 sa pulong nga “encourage” sa mga tinun-an sa pagpabakuna bisan ang dakbayan nakakab-ot na sa high vaccination rate.

“Wala ta miingon nga i-mandatory pag-ayo ang bakuna pero mao na ang kamandoan sa national ug mao sad na ang gi follow sa Ched (Commission on Higher Education),” matod ni Rosell.

Niadtong Hunyo 20, ang top executives sa 10 ka mga tunghaan ug unibersidad sa dakbayan ningbisita sa buhatan ni Rama ug ninghangyo nga paluagan pa ang coronavirus disease (Covid-19) pandemic restrictions aron makapahigayon sila og in-person learning.

Kini ang University of San Carlos, University of Southern Philippines Foundation, Don Bosco Technical College–Cebu University of San Jose-Recoletos, Cebu Institute of Technology-University, University of Cebu, Southwestern University, University of the Visayas, Cebu Institute of Medicine, ug Velez College.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph