KIDAPAWAN CITY -- Nailad matud pa sa pasalig sa mga komunista ang mag-amahan aron nga moabin sa grupo sa New People's Army (NPA) apan nakaamgo busa misurender ngadto sa militar alas 11:00 sa buntag, Miyerkules.
Ang mag-amahan nga mibalik sa sabakan sa balaod mao sila alyas Bobby ug alyas Ramon, pulos molupyo sa Barangay Magsaysay, Kibawe, Bukidnon.
Mga nahisgutan mga sakop sa Guerilla Front 57, Southern Mindanao Regional Committee 3 (SRC3).
Misurender ang mag-amahan ngadto sa 72nd Infantry Battalion, Philippine Army sa kampo mismo niini sa Barangay Greenfield, Arakan, Cotabato Province.
Dala sa mag-amahan ang duha ka .38 revolver nga pistola ug mga bala.
Matud ni alyas Bobby nga napugos siya sa pagsurender, uban sa iyang anak, tungod sa kamatinud-anon sa gobyerno (72IB) nga nitabang sa iyang duha ka anak nga babaye nga makabaton og kahigayonan nga magpuyo nga malinawon kinsa kanhi sab mga miyembro sa NPA.
Samtang ang 72nd IB, walay kakapoy usab nga naningkamot aron tapuson ang 53 ka tuig nga insurhensiya sa probinsiya sa Cotabato busa milampos kini sa ilang misyon.
Mag-amahan naa na karon sa kustodiya sa 72nd IB, 10ID, Philippine Army alang sa custodial debriefing ug gipailawom na sa Enhanced Comprehensive Local Integration Program alang sa dugang tabang human mibalik sa sabakan sa balaod.