65-anyos nigraduwar sa senior high

KORONADAL CITY -- Prayoridad ang pagtuon nga maoy angayan nga unahon imbis nga mawili sa social media.

Mao kini ang panawagan ngadto sa mga millennials karon sa 65-anyos nga biyuda nga si Lilia Bereber.

Gi-insister ni Bereber nga ang pagbaton og kurso sa kolehiyo maoy yawe sa maayong trabaho.

Kini human nga nalakip si Bereber sa 400 ka Senior High graduates nga mitapos sa Banga National High School sa Banga, South Cotabato.

Tug-an ni Bereber nga samtang nag-eskuwela siya, nagtrabaho sab siya sa samang higayon pinaagi sa pagpamaligya og mga appliances.

Naamgohan ni Bereber nga ipadayon ang iyang damgo nga makahuman sa pagtungha pinaagi sa online class ug karon sa face-to-face classes.

Nagpasalamat si Bereber sa suporta sa iyang mga magtutudlo ug sa iya mismong pamilya.

Nanghinaut si Bereber nga mokuwalipika siya sa programa sa gobyerno nga Unifast aron makapadayon sa iyang pag-eskuwela og komersiyo sa kolehiyo.