MGA tag-as nga opisyal sa Davao City nagpadayag sa ilang pasalamat ngadto kang kanhi President Rodrigo Duterte, kinsa opisyal nang mikanaug sa iyang katungdanan human ang unom ka tuig nga pagpangalagad.
Si Senator Christopher "Bong Go, sa Facebook post nagpaambit og selfie uban kang Duterte, pipila ka minutos una napupos ang iyang termino.
Si Go, dugay nga kaabag sa Presidente sukad pa kini nahimong mayor sa siyudad sa kapin 20 ka tuig, nagsulti nga nadasig siya sa Presidente nga modagan ug mahimong alagad sa publiko.
Ang bag-ong nahimong bise mayor sa siyudad nga si J. Melchor Quitain Jr. nagdayeg sab kang Duterte sa iyang "successful and fruitful" nga pag-alagad sa nasud.
Si outgoing Presidential Commission For The Urban Poor (PCUP) Commissioner Norman Baloro nagpasalamat sab sa Presidente tungod sa "trust and confidence" kaniya ug gitudlong komisyoner niadtong 2018.
Una siya natudlo, nagserbi siya isiip Davao City Social Services Development Office (karon City Social Welfare and Development Office) Buhangin District head.
Natapos na ang iyang termini isip PCUP commissioner for Mindanao kagahapon, Huwebes, ug magsugod na sab pagtrabaho alang sa Office of the Vice President (OVP) ubos sa Public Assistance Division.
Nagpasalamat sab si kanhi Konsehal Mary Joselle Villafuerte ngadto kang Duterte tungod sa iyang suporta sa health sector, ilabi na sa mga frontliners atol sa Covid-19 pandemic.
Laing kanhi konsehal, Danilo Dayanghirang, sa paghinabi sa radyo, nihatag sa kanhi Presidente og "95 percent" nga grado tungod sa iyang nahimo sa miaging unom ka tuig.
"Halos perfect ang iyang gihimo, atong pinangga nga Presidente," pung pa niya.
Gidayeg sab niya si kanhi mayor ug Vice President Sara Duterte sa iyang pagdumala sa siyudad sa miaging tulo ka sunod-sunod nga termino.
Apil nga nagdayeg sa kanhi Presidente mao si 10th Infantry Division (10ID) Commander Nolasco Mempin tungod sa Executive Order (EO) 70 -- nga nagmugna sa National Task Force to End the Local Communist Armed Conflict (NTF-Elcac), gilagdaan niadtong Disyembre 2018.
Samtang ang Davao-based radio personality ug Philippine Broadcasting Service Director General Rizal Giovanni “Bong” Aportadera nagpasalamat sab sa kanhi Presidente nga nagpiyal kaniya ang "radio arm" sa panggamhanan. (RGL/KSD)