Magsugod na ang termino ni Presidente Ferdinand R. Marcos, Jr. (PBBM) hangtud sa Hunyo 30, 2028. Daw sa miabag kaniya ang maayong higayon kay ang iyang giatubang, nga gikahadlokan sa iyang mga dumadapig, nga kasong disqualification ug pagkanselar sa iyang certificate of candidacy (COC) gibasura na sa Korte Suprema (SC).
Matuis pay buko sa kawayan sa desisyon sa SC kay unanimous man kini sa 13 ka mga Associate Justices ug Chief Justice gawas sa duha ka mahistrado nga mi-inhibit tungod sa ilang kalambigitan sa Cimmission on Elections (Comelec).
Gikahadlokan man gud nga tingalig madani ang mga mahistrado sa hangyo sa mga inilang tawo nga ilang nautangan og buot.
Hapit na usab makompleto ni PBBM ang tanang sakop sa iyang gabinete. Sila mao si: Vice President Sara Duterte Carpio (DepEd); Benhur Abalos (DILG); Vic Rodriguez (Executive Secretary); Rep. Boying Remulla (DOJ); Arsenio Balisacan (NEDA); Bienvenido Laguesma (DOLE); Susan Ople (Dept. of Migrant Workers); Benjamin Diokno (DOF); Alfredo Pascual (DTI); Antonio Lagdameo, Jr. (Special Asst. to the President); Manuel Bonoan (DPWH); Christina Frasco (DOT); Erwin Tulfo (DSWD); Trixie Cruz Angeles (Press Secretary); Amenah Pangandaman (DBM); Ivan John Uy (DICT); Zenaida Angping (PMS); Prof. Clarita Carlos (NSA); Conrado Estrella III (DAR); Jaime Bautista (DOTr); Silvestre Bello (MECO); Karlo Nograles (CSC); Christopher Pastrana (PPA); Menardo Guevara (Solicitor General); ug PBBM (DA). Ang ubang mga appointees mao sila si Cesar Chavez and Cheloy Garafil, undersecretaries (DOTr) ug Christopher Pastrana (PPA).
Sa mga local government units (LGUs) daghan nang mga bag-ong nawong karon. Ang mga casual ug mga job order workers nga wala mahatagi og bag-ong appointment dili na maka report sa ilang naandang trabaho kay gipulihan na sila og mga tinudlo nga dumadapig sa bag-ong administrasyon.
Sa Cebu City hall atong nasayran, suma sa napublikar niadtong milabay nga tuig, nga ang Siyudad adunay 1,000 ka regular employees, 3,000 ka casual ug 5,000 ka job order (JO) workers.
Karong bag-o gipahibawo ni Mayor Mike Rama nga 500 ka mga casual ug JO workers ang wala na niya hatagi og bag-ong appointment.
Kon mao anaa pay 7,500 ka casual ug JO ang nahabilin samtang nagpadayon pa ang evaluation sa mga empliyado. In fairness, dili kaha maayong atong pahibaw-on ang matangtang kon unsay iyang sala? Ako nagduda nga kadaghanan kanila wala mobutar sa nangagamhanan karon.
Natural lang nga ang mga naghago sa pagtabang kanila sa miaging eleksiyon mao na sab ang ilang hatagan og higayon nga makatrabaho inay ang ilang giingon nga mobuko-buko ug dili mobayad sa utang kabubot-on.
Swerte ang mga dapit diin midaug lang gihapon ang mga nangagamhanan. (mannyrabacal1144@gmail.com)