Bag-o na ang administrasiyon sugod sa Hunyo 30, 2022. Nikanaug na sa katungdanan si Presidente Rodrigo Duterte human sa unom ka mga tuig sa pangatungdanan nga puno sa kontrobersiya, apan puno usab sa mga pagdayeg labina sa mga tawo nga nakakita sa maayong epekto sa iyang anti drug campaign.
Daghan sab hinuon ang nakasaway labina niadtong namatyan og mga kabanay sa ‘war on drugs.’ Gikataho nga 7,000 kapin ang nangamatay sa gubat batok sa drugas, apan matod sa mga kritiko nga pil-on kini og pipila ka mga higayon.
Miasumer na man sila si Presidente Ferdinand Marcos Jr. ug Bise Presidente Sara Duterte. Mao pa lay pagsugod sa ilang paghimo sa katungdanan nga gisangon kanila isip pinili nga labing taas nga mga opisiyal sa nasod. Hain kahay maayo nga pasagdan sila sa ilang buhaton, suportahan kon maayo ug sawayon kon kini makadaut sa nasod. Bantayan ba sa umaabot nga mga buwan o katuigan.
Daghan gihapon ang wa naka move on sa resulta sa miaging eleksiyon. Sige lang gihapon sa pagpanaway ug bugalbugal nga unta human na man ang eleksiyon.
Kon wa nidaug ang kandidato nga gisuportahan, ibalhin kini ngadto sa pagbantay sa administrasiyong Marcos, kon di ba usab mahisama sa diktaduriya sa iyang amahan. Tan-awon og maayo kon ang iyang dalan nahasubay ba sa pagkamatarong ug makiangayon, naglantaw sa kahimtang sa mga kabos. Di baya lalim ang hagit nga atubangon nila ni Marcos ug Duterte.
Naay utang nga niabot na og P11 trillion. Naa pa gihapon ang mga hulga sa Covid-19 samtang daghan pa sa mga gagmay ug medium nga mga negusiyo nga wa pa makabangon human nalukapa bunga sa tumang kalisod atol sa pandemic.
Mag-unsa man ang paninguha nila kon naa say nagsige og bitad kanila paubos? Ang pagsige og uyog sa administrasiyon karon mas makadaut. Samtang wa pa maklaro unsay padulngan, mas maayong pasagdan lang una sila sa paghimo sa katungdanan ug suportahan.