Nagsugod sa opisyal nga serbisyo ang bag-ong napiling opisyal kagahapon sa udto, Hunyo 30, 2022, ang lider sa Simbahang Romano Katoliko sa Sugbo nipahinumdom nga magmatinud-anon sa Ginuo ug katawhan.

Si Cebu Archbishop Jose Palma niluwat og pamahayag kagahapon, Hunyo 30, nga ang katawhan nakapadayag pinaagi sa ilang boto ug ang simbahan nagkonsiderar niini nga ‘kabubut-on sa Ginuo.’

Karong nakalingkod na sa gahom ang napiling mga lider, si Palma niingon nga ang pagkapili usa ka dakong garbo ug pribilihiyo apan katugbang niini ang responsibilidad.

Ang Arsobispo nipahinumdom, labina ang nagsilbi sa Sugbo, nga magbaton sa hugot nga pagtuo sa Ginuo.

“Tungod ang Cebu kay religious kaayo, people have great faith. Dapat ang mga officers should be people who have faith and therefore they should be prayerful,” matod ni Palma.

Si Palma nagkanayon usab nga ang mga lider ilang hunahunaon nga sila alagad sa publiko human gipili sa katawhan.