Nalangkat sa Gilas Pilipinas women's basketball team ang bronze medal sa 2022 FIBA Under-16 Women's Asian Championship Group B human ilang gipukan ang Lebanon, 90-68 niadtong Hunyo 30 sa Prince Hamza Hall sa Amman.

Sa first half pa lang sa duwa, nilabaw na ang Gilas og pito ka puntos batok Lebanon.

Sa third quarter, mas nipakita pa sa ilang katakos ang Gilas hinungdan nga mas gilabwan pa niini ang kontra, 23-11.

Pag-abot sa 4th quarter, hayan na nga gilubong sa Gilas ang Lebanon og 32 puntos, 81-49.

Labaw og 22 puntos ang Gilas batok Lebanon sa final score sa duwa.

Nangulo sa kadaugan sa Pilipinas mao sila si Gabby Ramos ug Kristan Geyl Yumul, kinsa pulos nipauwan og 20 puntos matag usa.

Nitala sab si Ramos og lima ka rebounds ug tulo ka steals, samtang si Yumul adunay unom ka assists, tulo ka steals ug duha ka rebounds.

Samtang gipangulohan ni Angelina Maria Bado ang Lebanon pinaagi sa iyang 19 puntos ug lima ka rebounds.

Sa maong torneyo, nalangkat sa Samoa ang bulawang medalya human ilang gipildi ang Syria. 79-76. (LYC/JNP)