Moabot ngadto sa P4.4 billion nga balor sa illegal nga drugas ang nasakmit sa Police Regional Office 7 (PRO) 7 sukad gisugdan ang kampanya batok sa illegal nga drugas sa paglingkod sa katungdanan ni Presidente Rodrigo Duterte.
Sa data nga gipagawas sa PRO7, moabot usab og 55,574 ka drug personalities ang nadakpan sulod sa 40,227 ka anti-illegal drug operations sugod sa Hulyo 1, 2016 hangtod sa Hunyo 26, 2022.
Sa maong operations, nakasakmit sila og 614,216.29 ka gramos sa gituohang shabu nga adunay standard drug price (SDP) nga P4,176,670,772 samtang 2,373,839.93 grams sa marijuana nga adunay kantidad nga P284,860,791.
Ang katapusang labing dako nga nasakmit sa kapulisan mao ang 15 ka kilo sa gituohang shabu nga nakuha sa Lapu-Lapu City Police Office (LCPO) niadtong Sabado, Hunyo 25, 2022.
KRIMEN MIUBOS
Nunot sa paghingusog sa kampanya batok sa illegal nga drugas, niubos usab pag ayo ang crime volume sa eight focus crimes sa tibuok rehiyon 7.
Kini nunot sa ilang subsub nga anti-criminality programs uban sa malampuson nga police initiated operations sa matag city ug provincial police offices ug support units sa rehiyon nga maoy hinungdan sa pagkunhod sa 22 porsiyento nga crime volume matag tuig.
Sa crimes against property nga kasagaran nga mahitabo, nikunhod kini og 25 porsiyento diin nakatala lang sila og 1,803 ka kaso sulod sa unom ka mga tuig.
INTERNAL CLEANSING
Malampuson usab sila sa ilang pagdisiplina sa hut-ong sa kapulisan nga mao ang internal cleansing program, diin kadtong mga police personnel nga nakahimo og kalapasan ilang naaksiyunan.
Sa datus, moabot sa 90 ka badlungong mga pulis ang nangataktak sa serbisyo, 28 ang na demote ang ranggo samtang 217 ang nangasuspenso sukad sa Hulyo 2016.
“PRO7 vowed to go after erring policemen as part of the internal cleansing program of the PNP which aimed to produce a professional, dedicated, and disciplined police force,” matod ni Police Brigadier General Roque Eduardo Vega.
Si Vega padayon nga nihagit sa iyang mga sakop nga ipadayon ang nasugdan na nga nindot nga mga programa sa Philippine National Police (PNP) aron magpabilin ang kaluwasan sa mga lumolupyo sa Central Visayas sanglit mao kini ang ilang mandato.
Gipasalamatan ni Vega si Duterte sa gihatag nga suporta sa kapulisan sama sa pag-angkon nilag mga brand new nga kagamitan ug pagsaka sa ilang sweldo.
Sa bag-ong liderato ni Presidente Ferdinand “Bongbong” Marcos Jr., nisaad si Vega nga ilang ihatag ang tibuok suporta sa pamunoan niini.
Kon unsa man ang mga programa sa PNP nga iyang ipatuman, andam sila nga motuman ilabi na sa kampanya batok sa illegal nga drugas nga padayong problema nga gisagubang sa katilingban.