MOKANTIDAD sa P3.3 milyon ang total cash prize alang sa Pamulak sa Kadayawan (Floral Float Parade) nga mahitabo sa Agosto 21, 2022, kini maoy gihanyag sa lokal nga panggamhanan sa Davao.
Ang top three winners sa big category makadawat og P800,000, P600,000 ug P400,000 samtang duha ka consolation prizes nga P75,000 ang ihatag usab sa mga deserving entries.
Sa small category, ang premyong kuwarta nga P400,000, P300,000 ug P200,000 ang mabulsa sa first, second, ug third placers. Duha usab ka consolation prize nga P50,000 ang ihatag.
Sa alternative category, ang kampeyon makadawat og P150,000 samtang P75,000 ang runner-up, ug P50,000 ang third placer. Ang sunod nga duha ka entries makakuha matag usa og P20,000.
Ang Kadayawan sa Davao Facebook page nagpagawas sa opisyal nga guidelines ug mechanics sa floral float competition nga bukas sa bisan kinsang tawo, grupo, organisasyon, institusyon o kompaniya.
“The floral floats may be a free interpretation in the celebration of life, thanksgiving for the gifts of nature, the wealth of culture, and the bounties of the harvest of the city. Its traditions, myths, and legends shall depict the theme or concept of the Kadayawan sa Davao 2022 celebration, ‘Kasikas sa Kadayawan,’” subay sa napatik sa guidelines.
Ang usa ka dako nga float entry kinahanglan adunay labing gamay nga gidak-on nga walo ka tiil ang gilapdon ug 16 ka tiil ang gitas-on nga adunay labing menos 80 porsiyento nga presko nga bulak, tanum, prutas, o utanon isip medium.
Ang kinatas-ang gitas-on sa tanang dagkong float kinahanglang 14 ka tiil gikan sa yuta.
Samtang ang gamay nga float kinahanglan nga bisan unsa nga ubos sa walo ka piye ang gilapdon ug 16 ka piye ang gitas-on lakip na ang mga lumad o talagsaon nga gagmay nga mga sakyanan o mga gamit nga mahimo'g de-motor o manual nga gimaneho. Ang mga entry mahimo usab nga maglakip apan dili limitado sa mga mini-car, golf cart, mini tractors, push cart, karo, ug pedicabs, ug uban pa.
Ang gagmay nga mga float nga adunay labing taas nga gitas-on nga 14 ka piye gikan sa yuta, kinahanglan mogamit labing menos 80 porsiyento nga presko nga mga bulak, tanum, prutas, o utanon isip medium.
Ang deadline sa pagsumite sa mga entries karong Agosto 8, 2022.
Alang sa mga pangutana, bisitaha ang Davao City Tourism Operations Office, nga anaa sa ikaupat nga andana sa Davao City Investment and Tourism Promotions Building sa Palma Gil Street o kontaka ang mobile number (0968) 223-0613. (Jeepy P. Compio/CIO)