GIPAHIMANGNOAN sa Davao City Anti-Scam Unit ang mga Dabawenyo batok sa mga peke nga wedding packages nga gitanyag online, nag-awhag kanila nga susihon kanunay ang mga business permit sa mga organizers.

Sumala ni Anti-Scam Unit Head Simplicio Sagarino sa Davao City Disaster Radio niadtong Miyerkules, Hunyo 29, 2022, nga kinahanglan susihon gayod sa kaslunon ang business bureau permit sa organizer una mopagula og kuwarta.

"Tan-awon gyod sa couple kung asa ang ilahang permit naa ba sila’y Bureau of Internal Revenue (BIR) permit, naa ba sila’y Business Bureau permit kay naa man gyud na’ay permit diha," ingon ni Sagarino, kinsa nidugang nga makatabang usab kini sa mga magtiayon nga personal nga makigkita sa ilang wedding organizer ug dili lang maghisgot sa kalihokan online.

Si Sagarino nipagawas sa pahimangno human makadawat og taho nga 30 ka magtiayon ang giingong gi-scam sa usa ka wedding organizer nga nakabase sa Davao, kinsa mitanyag og package nga nagkantidad og P65,000 aron iapil ang venue, pagkaon ug gown. Kini nga mga magtiayon halos na-fully paid na sa ilang mga bayrunon apan walay kasal nga nahitabo.

Si Sagarino sa buwag nga pakighinabi sa City Information Office (CIO) niadtong Huwebes sa hapon nibutyag nga nakadawat sila og opisyal nga reklamo gikan sa unom ka magtiayon. Usa ka sulat sa imbitasyon ang gipadala sa organizer ug usa ka dayalogo tali sa mga partido gitakda sa Hulyo 6, 2022, Miyerkules, aron hisgutan ang isyu.

Dugang pa niya nga gawas sa pagpasaka og mga reklamo sa mga scam, mahimo usab nga moadto ang publiko sa ilang buhatan, motawag sa numero sa ilang opisina: 082-225-6044, o mag-email sa antiscam@davaocity.gov.ph, alang sa mga pangutana kalabot sa mga tawo nga ilang gipangita ug sa mga package sa kasal.

"Una sila magkuha ug packages, puwede sila moadto sa amoang opisina mangutana sila para naa ta’y ma-advise sa ilaha kay mangutana man ta kung kaning tawhana naa ba ni sila’y permit para mahibal-an nato kung tinuod ba sila nagsubay sa balaod nga magkuha una ug permit para sa mga events," ingon ni Sagarino. (Uban sa taho sa CIO)