DAVAO DEL NORTE -

MIANI og di matukib nga pagdayeg ug pagpasalamat ang konduktor sa depasaheroang bus nga nagbiyahian sa lungsod sa Compostela paingon sa Siyudad sa Davao.

Kini human nauli pinaagi kaniya ang pitaka nga dunay sulod nga kuwarta ug mga identification cards (IDs) sa pasahero nga nakasakay sa gi-konduktoran niining bus sayo sa buntag niadtong Huwebes.

Giila ang konduktor nga si Santiago V. Abaloyan III, minyo ug konduktor sa Golden Valley Bus.

Gisaysay ni Lizel Bonales pinaagi sa post sa iyang Facebook page nga sayo sa buntag sa maong adlaw misakay siya sa nahisgutang bus gikan sa lungsod sa Nabunturan sa probinsiya paingon sa siyudad sa Tagum aron nga motrabaho.

Matud pa nga nalipay ang dalaga kay wa pa'y alas 7 sa buntag miabot na siya sa Tagum nga wa nakagasto og pamasahe sanglit usa ang maong bus sa mga nagahanyag og "Libreng Sakay".

Apan sumala pa nga sa dihang mobayad na unta siya sa gisakyang motorsiklo pag-abot niya sa gitrabahoang opisina, nadeparahan niini nga nawala ang iyang pitaka nga gisulod sa shoulder bag.

Wala na magdahom ang dalaga nga mahibalik kaniya ang kuwarta sulod sa pitaka apan giampo niya nga mauli ang mga IDs ug uban pang sulod niini.

Apan dako na lang ang iyang kalipay sa dihang mismong si Abaloyan maoy mi-chat niya ug miingon nga naa kaniya ang nawalang pitaka sa dalaga.

Nahibalik ang pitaka ni Bonalos nga personal nga giuli sa konduktor ug gikalipay'g dako niini sanglit wa'y bisan usa nga nawala sa sulod niini.

Sa paghagpat ning maong balita, miabot na og 3.2K ang likes sa post ni Bonalos, 725 shares ug 381 comments nga pulos pagdayeg sa konduktor nga si Abaloyan sanglit gipamatud-an niini nga luyo sa kapit-os ug kalisod sa panahon duna pa gihapoy mga tawo nga dunay bulawanong kasingkasing.