Ang Consolacion Community College (CCC) pormal nang gihiusa sa Cebu Technological University (CTU) pinaagi sa pagpasar sa balaudnon, sumala sa na-post sa Facebook sa municipal government sa Consolacion sa Miyerkules, Hunyo 29, 2022.
Ang CCC usa na sa campuses sa CTU ug mahimo na kini nga Cebu Technological University-Consolacion Campus subay sa Republic Act no. 11800, o naila nga Cebu Technological University-Consolacion Campus Act.
Ang balaud naaprobahan sa Mayo 27 isip usa sa 12 ka balaud ni outgoing President Rodrigo Duterte sa wa pa nibiya sa gahom sa Hunyo 30, 2022.
Ubos sa RA 11800, ang CCC ubos na sa full supervision sa CTU. Ang tanang assets, real, personal, personnel, ug records sa naasoy nga community college, lakip sa liabilities o obligations, ibalhin tanan sa state university.
Ang CTU-Consolacion Campus pagapangulohan sa campus administrator nga gitudlo sa board of regents sa CTU pinaagi sa rekomendasiyon sa search committee ug Presidente, diin subject sa guidelines.
Isip community college nga mahimong state university, kini nagpasabot nga makatanyag na og bachelor’s, master’s, ug bisan doctoral programs ang tunghan.
Sa Disyembre 20, 2019, ang Consolacion municipal council, ubos sa pagpangulo ni kangi vice mayor ug karon Mayor Teresa “Nene” Alegado, nipasar og resolusyon nga naghangyo sa Cebu Sixth District, karon Mandaue City Lone District Rep. Emmarie “Lolypop” Ouano-Dizon, sa pag-sponsor sa balaudnon nga maghimo sa CCC nga satellite campus sa CTU.
Si CTU Main Campus Director, Dr. Joseph Pepito, nisuwat kang Dizon sa Pebrero 26, 2020, nga ang CTU komitado sa paghatag og libre nga quality tertiary education sa komunidad, diin makita sa ilang daghang satellite campuses sa Cebu province.
“The CTU welcomes CCC of Consolacion to affiliate and is very much willing to support the realization of this endeavor,” matod ni Pepito.
Ang CTU karon duna nay 23 ka campuses sa tibuok lalawigan sa Sugbo.
Uban sa pag-aprobar, si Dizon niduso dayon sa House Bill No. 7194, nahiusa ang CCC isip usa sa satellite campuses sa CTU.
Ang regulasyon moepekto sa 15 ka adlaw human sa pagmantala niini sa “Official Gazette” o newspaper of general circulation.