Daghang mipadangat sa ilang mga sentimento sa akong lindog sa miaging Sabado mahitungod sa mga pulong ug buhat nga di maayo kay makapainsulto o pasakit ni Adan (bana o uyab).
Karong adlawa, si Eva na sab atong hisgutan pamasin nga kining lindog maka-pukaw sa pagbati ug huna-huna ni Adan unya malikayan ang pagpasakit ngadto sa ilang mga asawa o uyab.
Sa Gentleman’s Gazette nga akong nabasahan, kining mosunod ang mga pulong o buhat nga di angay isulti ni Adan kang Eva:
‘Mabdos ka?’ Bastos kining ipangutana labi na kon buy-unon, may edad, dako o burot ang tiyan kay wa ta kahibalo kon bag-o kining nanganak, dunay sakit sama sa tumor sa tiyan o tambok lang. ‘Mind your own business’, di ba?
‘Di ka parehas sa ubang babaye’. Usahay bation nato nga espisyal ta kon makadungog ini apan sa tinuod lang makainsulto kini nga pulong. Ang mga babaye bisag kaluha pa dunay lainlaing kinaiya ug batasan kay gipakatawo kita nga unique. Di lumba o kumpitensiya ang pagkababaye.
‘Sexy ka pero di ikabilin sa balay’. Nagpasabot kini nga wa siyay plano nga i-introduce ka sa iyang ginikanan o pakaslan.
‘Wa kay huna-huna o plano mag-diet?’ mura ra nig nag- ingon nimo nga tambok ka, o segi ra ka og kaon o nagpuyo sa kusina?
‘Wa kay plano pawala sa imong stretch marks?’ dako kining insulto sa kababayen-an kay kasagaran baya sa nainat nga panit, labi na sa may tiyan, tungod sa pagsabak. Ang sabakan naghatag og gasa sa kinabuhi maong di kini angay ikauwaw.
‘Nganong wa pa man ka maminyo?’ Ang pagminyo di lumba. Way magbuot kon unsaon niya pagpadagan iyang kinabuhi. Daghang mga dalagang ulay nga malipayon unya duna say daghang minyo nga masulub-on unya magbuwag ra gihapon, di ba? In other words, way labot ang ubang tawo sa imong lovelife.
‘Ikapila naman na nimong bathala? Wa pa gihapon ka matagam sa imong mga kanhi?’ Way katungod si Adan nga mang husga bisag kapila pa siya nagpahigot. Sala ba diay ni Eva nga siya maanyag o madanihon?