Dugang 25 ka mga katre ang gipahuwam sa Philippine Red Cross sa infirmary sa lungsod sa Barili ug Barili District Hospital tungod sa padayong pagsaka sa mga naadmit sa mga kaso sa typhoid fever o tipus sa lungsod.

Gipahibaw sa Kagamhanan sa Lungsod nga 13 ka mga cot bed ang gipahuwam sa infirmary samtang 12 usab sa BDH.

Subay sa kasamtangang talaan sa kagamhanan, moabot sa 44 ka mga kaso sa tipus ang naa pa samtang dunay 26 ka mga kaso sa dengue.

Sa maong datos, 17 ang anaa sa Barili infirmary samtang 27 niini ang anaa sa district hospital.

Aron padayong mapugngan ang pagkatap sa kagaw sa tipus, padayong giawhag sa Municipal Health Office (MHO) ang mga residente sa pag gamit sa giapod-apud nga mga chlorine sa tubig ug pag-init sa tubig niini aron kalikayan ang samang sakit.

Ang lungsod nagsagubang sa pagkuyanap sa typhoid fever sukad niadtong Marso, diin tulo na ka mga lumolupyo ang nangamatay sa mao nga sakit.