Napasakaan na og kasong robbery with homicide ug frustrated murder si James Harvey Nengasca, 22, suspek sa pagtulis ug pagpatay sa iyang iyaan nga si Arsenia Nengasca Alidan ug pagkaangol sa laing iyaan nga si Belen Nengasca Biton niadtong Dominggo sa hapon.

Matud ni Police Lieutenant Roberto Barnido, hepe sa Aloguinsan Police Station, nga napasaka na ang duha ka mga kaso alang sa inquest proceedings sa Provincial Prosecutor’s Office.

Samtang ang kaso ni Nengasca ipasa sa dakbayan sa Toledo kay adto i-raffle kon asa nga korte ang mohawid.

Dugang ni Barnido nga si Nengasca anaa sa ilang kustodiya karon, samtang karong adlawa, laing kaso usab ang atubangon niini human nakuhaan og shabu ug armas sa kapulisan dihang.

Ang Provincial Intelligence Unit (PIU) sa Cebu Provincial Police Office (CPPO) maoy mopasaka sa buwag nga kaso tungod sa kalapasan sa Republic Act (RA) 10591 tungod sa ilegal nga paghupot og armas ug Republic Act (RA 9165) kun Comprehensive Dangerous Drugs Act of 2002 human siya nakuhaan og ilegal nga drugas.

Si Nengasca nadakpan niadtong Hunyo 26 sa Barangay Lagtang sa dakbayan sa Talisay kon diin didto siya nag tago-tago human niya gitulis ug gipatay ang iyang iyaan ug pagsuway og patay sa laing iyaan.

Ang grupo ni Police Lieutenant Colonel Mark Gifter Sucalit, hepe sa PIU, uban ang Talisay City Police Station nialarma sa usa ka armed person sa dapit human nasuta nga dunay usa ka lalaki nga kadudahang may dala nga armas ug nisibo sa diskripsyon ni Nengasca.

Si Nengasca nangatarungan nga igo ra unta siyang manghuwam og P5,000 sa iyang iyaan human siya napilde sa sabong.

Apan wa siya pahuwama hinungdan nga iya kining gidunggab makadaghan gamit ang gunting.