Asawa nga usa ka call center agent giingong gikulata ug gipriso sa iyang bana sa underground sa ilang balay kay nasakpang dunay gikagakosgakos nga laing lalaki sa usa ka video nga gipadala ngadto sa mister.
Nangaukay ang mga silingan sa ala 1:30 sa hapon sa Biyernes human gialarmahan ug girespondihan ang insidente sa Brgy. Can-asujan, dakbayan sa Carcar.
Ang 22 anyos nga bana nga walay trabaho gitanggong sa detention cell sa Carcar Police Station human gireklamo ug gihikay sa kapulisan ang kasong kalapasan sa Republic Act (RA ) 10591 kun Comprehensive Firearms and Ammunition Regulation Act; Republic Act (RA) 9262 kun Anti-Violence Against Women and their Children Act of 2004 ug illegal detention.
Si Kobe ( di tinuod niyang ngan) nasuko og maayo sa iyang asawa nga si Dianne (di tinuod nga ngan), 22, human niya nakita ang usa ka video nga grabe kaayong nakiglayugay sa usa lalaki, butyag ni Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu.
Matod ni Cabagnot nga alas 11:00 sa buntag niabot si Dianne gikan sa trabaho.
Wala pa gani makakanaog sa habalhabal nga gisakyan, gibira na siya ni Kobe, giguroy ug gipatidpatiran.
Human niya og kulata, si Dianne gidala ngadto sa underground sa ilang balay ug gikandaduhan.
Giingong gitiunan ug gihulgang pusilon ang iyang asawa gamit ang pugakhang.
Ang inahan ni Dianne daling nidagan ngadto sa ilang barangay hall ug nangayo og abag.
Dali sab nga nanawag sa kapulisan ang mga opisyal sa barangay.
Sila Police Staff Sgt. Chuck Dayuja, Patrolman Christian Dave Casul, Patrolman Claide Acao, uban sa Women and Children protection Desk (WCPD) personnel Police Staff Sgt. Camia Codo, daling ningrespondi sa lugar alas 12:00 sa udto.
Ilang naabtan si Kobe nga didto sa underground sa panimalay uban sa iyang asawa, nagdala og pugakhang ug nanghulga sa asawa.
Gumikan niini, daling gipahigayon ang negosasyon og mga kapin sa usa ka oras ug napusasan si Kobe samtang na-rescue ang biktima.
Narekuber sa kapulisan ang usa ka pugakhang uban sa tulo ka mga bala sa 12-gauge shotgun.
Si Cabagnot nibutyag nga si Dianne nitug-an nga ikaduha na nga higayon siyang gipriso sa iyang bana sa underground sa panimalay.
Ang unang insidente niadtong Abril 2022, diin duha ka adlaw siya sa underground.
Niangkon si Dianne nga nagselos ang iyang bana human siya nasakpan nga dunay karelasyon nga laing lalaki.
Niangkon siyang nakasala sa ilang kaminyuon, apan gumikan usab kini sa ka seloso sa bana ug kakusog aning mangulata.
Gumikan niadto, nagkabuwag sila sa iyang bana.
Apan tungod sa ilang anak nga 3 anyos ug manghud nga tulo pa ka buwan, nagkabalik sila.
“Naalburoto ang bana kay nakakita man siya sa video gipadala to Messenger sa higala. Enjoy kaayo ang asawa haloghalog atong lalaki,” dugang ni Cabagnot.
Si Dianne nipadayag nga dili na siya makigbalik pa sa iyang bana.
Nakahukom na siyang pasakaan kini og kaso sa korte aron di na masubli ang pangabuso.