Niani og nagkalainlaing reaksiyon ang inaugural speech ni Presidente Ferdinand ‘Bongbong’ Marcos, Jr. sa Philippine National Museum sa Manila niadtong Huwebes, Hunyo 30, 2022.

Namakpak ang iyang mga dumadapig apan ang mga oposisyon ug mga sakop sa militantanting grupo, sama sa naandan, puno sa pagsaway sa unod sa pakigpulong bisan sa importanteng punto, sama sa seguridad sa pagkaon.

Maingon nga pulos motherhood ang gipamulong human wala pa kini ikapakita nga ebidensiya o mihuras. Masabtan usab nga wa mohisgot si Bongbong bahin sa akusasyon nga halapad sa paglapas sa tawhanong katungod ug korapsiyon panahon sa rehimen sa iyang amahan. Todo pahumot ang pamahayag. Kinsa bay gusto modaut sa kaugalingon?

Hinuon, mas maayo nga magpadayon ang pagpakabana aron maduso sa pagtuman sa iyang gipanulti. Sayod kita nga dili kini matuman sa usa ka pagpamilok sa mata. Hatagan nato og panahon nga makasikad, labing ubos sulod sa usa ka tuig aron hinayhinay nga paninglan.

Ug ning sayo, maaninaw nga may kalamboan sa seguridad sa pagkaon. Wala pa siya nanumpa isip ika-17 nga presidente sa Pilipinas, nipadayag na nga temporaryong molingkod isip kalihim sa agrikultura.

Nanagana siya sa nag-unang-ong nga halapad nga kagutom nga epekto sa pandemiya sa Covid-19 ug ang kagubot tali sa Russia ug Ukraine nga nimugna og global crisis.

Lakip sa iyang saad ang pag-ugmad sa agrikultura aron maluwas sa pagsalig importasyon. Ang Pilipinas nag-una sa Asya sa International Rice Research Institute (IRRI) sa UP Los Baños nga namugna sa amahan ni Bongbong.

Apan karon, ang mga nasod nga nagtuon sa IRRA mao na hinuon ang tinubdan sa atong importasyon sa bugas?

Way bili ang pagkaadunahan. Pagsutoy sa teknolohiya, apan nagkutoy ang tiyan. Gubot ug kaguliyang ang resulta - rebelyon.