Usa sa mga aspeto nga gikinahanglan kaayo sa bisan asa nga field aron positibong tan-awon sa publiko mao ang public relations. Kanang mapresentar ang kaugalingon sa positibong paagi ngadto sa publiko o sa targeted audience.
Sama sa mga bike brand, gikinahanglan ang maayong publicity sa iyang mga produkto hinungdan nga mo-sponsor sila og riders nga mogamit sa ilang mga biseklita, sama sa frames ug uban pa. Ilang gastuhan sa tanang panginahanglan, gikan sa jersey, training ug mga biyahe alang sa mga kompetisiyon. Kon PR o advertising, ang tumong mao ang pag-umol og positibong imahe nga makita sa publiko.
Mao ni ang rason nganong makakita ka og teams sa Specialized, Trek ug uban pa sa mga international competition. Bisan gani sa mga food supplement, tipik sa ilang advertising mao ang pag sponsor og athletes.
Sa ilang advertising seguradong naa ang ngan sa atleta nga sikat nga naggamit sa ilang mga produkto. Niini, mahimong positibo ang pagtan-aw sa publiko.
Ang labing sikat karon mao ang social media, labina ang Facebook diin milyunes ang makakita. Mga pribadong kompaniya maayong nakagamit niini, sa ilang tree planting activities, river and seashore clean up.
MAAYO MOGAMIT
Sa natad sa trapiko dinhi, ang maayo og public relations mao ang City of Talisay Traffic Operations and Development Authority (CT-TODA) nga gipangulohan sa akong higala nga si Jonathan “Joy” Tumulak. Gipakita nila ang ilang positibong gipangbuhat sama sa paghawan sa karsada kon dunay mangatagak nga graba ug uban pa nga kuyaw sa mga nagmotorsiklo.
Gipakita usab ang pagpakigtagbo nila sa nagkadaiyang mga organisasiyon sa mga driver alang sa konsultasiyon ug pagpahibawo sa mga bag-ong lagda ug uban pang positibo nga buhat. Dali pa kaayong ma contact si Joy.
Nakasabot si Mayor Samsam Gullas sa ka importante ini nga aspeto ug swerte siya nga nakakuha ni Joy kay gawas nga kahibawo sa PR, trained sab ni sa natad sa trapiko sa abroad.
Lahi ang nahitabo sa Cebu City Traffic Operations and Management (CCTO) kay kaning ilang tigpamaba nga si Paul Gotiong, tawgan ug teksan, dedma man. Isip editor, naa may time nga wa ang reporter o di na ma contact ang reporter, modiretso sa source ang editor aron makompleto ang estorya ug maayo ang unod. O dunay gustong klaruhon.
Di sab tingali hanggaw nang ilang mga sakop nga nihatag og number kay di ra man usa ang nihatag nako, the same ra man ang numero.
Mas maayo pa si Mayor Michael Rama, basta makabasa lang sa text, bisan padung nang mopahuway, motubag pa.
POSITIBO
Ang laing maayong nakagamit aning PR mao ang akong higalang si Atty. Gerry Carillo. Maayo kaayo ang iyang PR projection, sama sa pagtukod og bike patrollers nga di lang manakop, moabag usab sa mga motorista ug pedestrians.
Nanghatag pa sila og bike helmets. Wa ipakita nga nagsige og panakop ug pila nay nadakpan.
Ingon ana ka importante ang PR. Tipik sab sa maayong projection mao ang accessibility sa opisyal.